រុស្ស៊ី​ប​​ង្វែរទិស​ដៅ​​​នៅ​​អ៊ុយក្រែន?

 រុស្ស៊ីបានបំផ្លាញឃ្លាំងគ្រាប់ធញ្ញជាតិរបស់អ៊ុយក្រែននៅលើទន្លេDanube ក្នុងការវាយប្រហារដោយយន្តហោះគ្មានមនុស្សបើកកាលពីថ្ងៃទី២៤ខែកក្កដា ដោយផ្តោតលើផ្លូវនាំចេញដ៏សំខាន់ទៅកាន់ទីក្រុងគៀវ ។

ឃ្លាំង​គ្រាប់​ធញ្ញជាតិ​ត្រូវ​បាន​បំផ្លាញ​បន្ទាប់​ពី​ការ​វាយ​ប្រហារ​ដោយ​យន្តហោះ​គ្មាន​មនុស្ស​បើក​របស់​រុស្ស៊ី​នៅ​ក្នុង​ទីក្រុងOdessa ប្រទេស​អ៊ុយក្រែន​កាល​ពី​ថ្ងៃ​ទី ២៤ ខែ​កក្កដា។ រូបថត៖Reuters

នេះគឺជាការវិឌ្ឍន៍ថ្មីមួយនៅក្នុងយុទ្ធនាការផ្លូវអាកាសដែលទីក្រុងម៉ូស្គូបានចាប់ផ្តើមធ្វើបន្ទាប់ពីការដកខ្លួនចេញពីកិច្ចព្រមព្រៀងគំនិតផ្តួចផ្តើមគ្រាប់ធញ្ញជាតិសមុទ្រខ្មៅកាលពីដើមសប្តាហ៍មុន។ការ​វាយ​ប្រហារ​របស់​រុស្ស៊ី​កាល​ពី​សប្តាហ៍​មុន​ផ្តោត​សំខាន់​លើ​កំពង់ផែ​សមុទ្រ​ក្នុង​ក្រុង Odessa ប្រទេស​អ៊ុយក្រែន។ ទោះជាយ៉ាងណាក៏ដោយ ការវាយប្រហារមុនព្រលឹមនៅថ្ងៃទី ២៤ខែកក្កដាបានកំណត់គោលដៅលើហេដ្ឋារចនាសម្ព័ន្ធតាមបណ្តោយទន្លេ Danube ។ផ្លូវនាំចេញកាន់តែមានសារៈសំខាន់សម្រាប់ទីក្រុងគៀវ ចាប់តាំងពីការដួលរលំនៃកិច្ចព្រមព្រៀងដែលអនុញ្ញាតឱ្យដឹកជញ្ជូនគ្រាប់ធញ្ញជាតិរបស់អ៊ុយក្រែនឆ្លងកាត់សមុទ្រខ្មៅ។នេះបើយោងតាមទីភ្នាក់ងារសារព័ត៌មាន Reuters ។អភិបាលតំបន់ Odessa លោក Oleh Kiper បានសរសេរនៅលើកម្មវិធីផ្ញើសារ Telegram ថា "រុស្ស៊ីបានវាយប្រហារតំបន់Odessa ម្តងទៀតពេញមួយយប់។ លើកនេះ គោលដៅគឺហេដ្ឋារចនាសម្ព័ន្ធកំពង់ផែនៅលើទន្លេ Danube" ។គេហទំព័រ Reni-Odesa បានដកស្រង់សម្តីមន្ត្រីក្នុងតំបន់ដែលនិយាយថា ឃ្លាំងគ្រាប់ធញ្ញជាតិចំនួនបីនៅក្នុងទីក្រុងកំពង់ផែ Reni ត្រូវបានបំផ្លាញ។យោងតាមប៉ូលីសក្នុងតំបន់ ឃ្លាំងគ្រាប់ធញ្ញជាតិ រួមជាមួយនឹងប្រអប់ទំនិញជាច្រើនផ្សេងទៀតត្រូវបានវាយប្រហារ បណ្តាលឲ្យមានអគ្គីភ័យឆាបឆេះ បណ្តាលឲ្យមនុស្ស៧នាក់រងរបួស ក្នុងនោះម្នាក់ស្ថិតក្នុងស្ថានភាពធ្ងន់ធ្ងរ។រូបថតនៃការខូចខាតដែលបានចេញផ្សាយដោយប៉ូលីសបង្ហាញប្រអប់ដែលមាននិមិត្តសញ្ញានៃក្រុមដឹកជញ្ជូន Maersk។ទីក្រុងReniគឺជាមជ្ឈមណ្ឌលដឹកជញ្ជូនដ៏សំខាន់មួយឆ្លងកាត់ទន្លេ Danube ដោយនាំយកគ្រាប់ធញ្ញជាតិទៅកាន់ប្រទេសរូម៉ានី។ប្រព័ន្ធផ្សព្វផ្សាយអ៊ុយក្រែនមួយចំនួនក៏បានរាយការណ៍ផងដែរពីការផ្ទុះជាច្រើនយប់នៅក្នុងតំបន់Izmailដែលជាកំពង់ផែដ៏សំខាន់មួយផ្សេងទៀតនៅលើទន្លេDanube។ប៉ុន្តែមិនមានការខូចខាតណាមួយត្រូវបានរាយការណ៍ឡើយ។ក្រោយការវាយប្រហារ ប្រធានាធិបតីរ៉ូម៉ានី លោក Klaus Iohannis បានព្រមានថាសន្តិសុខនៅសមុទ្រខ្មៅគឺស្ថិតក្នុងហានិភ័យ។ ប្រធានាធិបតីរ៉ូម៉ានីបានសរសេរនៅលើTwitterថា"ការកើនឡើងនាពេលថ្មីៗនេះ បង្កហានិភ័យយ៉ាងធ្ងន់ធ្ងរដល់សន្តិសុខនៅក្នុងសមុទ្រខ្មៅ។ វាក៏ប៉ះពាល់ដល់ការដឹកជញ្ជូនគ្រាប់ធញ្ញជាតិរបស់អ៊ុយក្រែនផងដែរ ។ដោយហេតុនេះប៉ះពាល់ដល់សន្តិសុខស្បៀងពិភពលោក"។ពាណិជ្ជករ​បារាំង​ម្នាក់​បាន​ហៅ​វា​ថា​ជា​«​ការ​វិឌ្ឍន៍​ដ៏​សំខាន់​និង​ការ​វាយ​ប្រហារ​ដ៏​ធំ​មួយ​»​ចំពោះ​ការ​នាំ​ចេញ​របស់​អ៊ុយក្រែន។ អ្នក​នោះ​បាន​អត្ថាធិប្បាយ​ថា​៖ «​បើ​គ្មាន​ច្រក​របៀង​នាំ​ចេញ​គ្រាប់​ធញ្ញជាតិ​សមុទ្រ​ខ្មៅ ហើយ​ឥឡូវ​វាយ​ប្រហារ​លើ​ផ្លូវ​ផ្សេង​ទៀតវា​នឹង​ពិបាក​ណាស់​ក្នុង​ការ​ដក​គ្រាប់​ធញ្ញជាតិ​ចេញ​ពី​អ៊ុយក្រែន»។ប៉ុន្មានម៉ោងបន្ទាប់ពីការវាយប្រហារថ្ងៃទី២៤ខែកក្កដា អគ្គលេខាធិការអង្គការសហប្រជាជាតិលោក Antonio Guterres បានអំពាវនាវឱ្យទីក្រុងម៉ូស្គូត្រឡប់ទៅកិច្ចព្រមព្រៀងគ្រាប់ធញ្ញជាតិសមុទ្រខ្មៅវិញតាមសំណើបានធ្វើចំពោះប្រធានាធិបតីរុស្ស៊ីលោក Vladimir Putin ។នៅថ្ងៃទី២៤ខែកក្កដាផងដែរប្រធានាធិបតីអ៊ុយក្រែនលោក Volodymyr Zelensky បាននិយាយថាវា "មិនអាចទទួលយកបាន" ចំពោះការផ្លាស់ប្តូរណាមួយរបស់សហភាពអឺរ៉ុប (EU) ដើម្បីពង្រីកការរឹតបន្តឹងលើគ្រាប់ធញ្ញជាតិរបស់ប្រទេសដើម្បីការពារកសិករក្នុងស្រុក។លោក Zelensky បាននិយាយថាលោកសង្ឃឹមថាអឺរ៉ុប "នឹងបំពេញកាតព្វកិច្ចរបស់ខ្លួន"បន្ទាប់ពីការដាក់កម្រិតបច្ចុប្បន្នលើគ្រាប់ធញ្ញជាតិអ៊ុយក្រែនផុតកំណត់នៅថ្ងៃទី១៥ខែកញ្ញា។កាល​ពី​សប្តាហ៍​មុន ប្រទេស​ជិត​ខាង​អឺរ៉ុប​របស់​អ៊ុយក្រែន​បាន​អំពាវនាវ​ឲ្យ​សហភាព​អឺរ៉ុប​បន្ត​ការ​ហាម​ឃាត់​ការ​នាំ​ចូល​គ្រាប់​ធញ្ញជាតិ​រហូត​ដល់​ដំណាច់​ឆ្នាំ។ កសិករនៅប្រទេសប៉ូឡូញ ប៊ុលហ្គារី ហុងគ្រី ស្លូវ៉ាគី និងរូម៉ានី បានបន្ទោសការនាំចូលគ្រាប់ធញ្ញជាតិថោកពីអ៊ុយក្រែនថាជាមូលហេតុនៃការលំបាកសម្រាប់ផលិតផលក្នុងស្រុក។ខាងភាគីរុស្ស៊ី មួយសប្តាហ៍បន្ទាប់ពីការសម្រេចចិត្តដកខ្លួនចេញពីគំនិតផ្តួចផ្តើមគ្រាប់ធញ្ញជាតិសមុទ្រខ្មៅ លោកប្រធានាធិបតីPutinកាលពីថ្ងៃទី ២៤ ខែកក្កដា បានសន្យាថានឹងខិតខំប្រឹងប្រែងដើម្បីធានាការផ្គត់ផ្គង់គ្រាប់ធញ្ញជាតិ អាហារនិងជីសម្រាប់អាហ្វ្រិក៕ប្រភពCNN