សម្ដេច​​ហ៊ុ​ន សែ​ន​៖កម្ពុជានឹង​មាន​នាយក​រដ្ឋមន្រ្តីថ្មីបន្ដដឹក​​នាំប្រទេសដើម្បី​បម្រើ​​ផល​ប្រ​យោជន៍ប្រជា​​ពល​រដ្ឋជាម្ចាស់​​ឆ្នោត

សម្ដេចហ៊ុន សែននាយករដ្ឋមន្រ្តីនៃកម្ពុជាមានប្រសាសន៍​ថា នៅពេលដ៏ខ្លីខាងមុខនេះកម្ពុជានឹងមាននាយករដ្ឋមន្រ្តីថ្មីបន្ដដឹកនាំប្រទេស ដើម្បី​បម្រើ​ផលប្រយោជន៍ប្រជាពលរដ្ឋជាម្ចាស់ឆ្នោត។

រូបភាពBBC

នៅលើបណ្ដាញតេឡេក្រាមនាថ្ងៃទី ២៨ ខែកក្កដា ឆ្នាំ២០២៣ សម្ដេចហ៊ុន សែន បានសរសេរថា ច្បាស់ណាស់ គឺនៅពេលដ៏ខ្លីខាងមុខនេះ កម្ពុជានឹងមាននាយករដ្ឋ​មន្រ្តីថ្មីបន្ដដឹកនាំប្រទេសដើម្បីបម្រើផលប្រយោជន៍ប្រជាពលរដ្ឋជាម្ចាស់ឆ្នោត។​សម្ដេចបញ្ជាក់ថាគណបក្សប្រជាជនកម្ពុជាឈ្នះគឺខ្មែរឈ្នះទាំងអស់គ្នា ហើយ​គណ​បក្សនានា ក៏អាចរួមរស់ក្រោមម្លប់សន្តិភាពបានទាំងអស់គ្នា។សម្ដេចនាយករដ្ឋមន្ត្រីក៏បានអរគុណបងប្អូនជនរួមជាតិដែលបានផ្តល់​នូវ​សេចក្តីស្រឡាញ់ការគាំទ្រនិងទំនុកចិត្តជ្រាលជ្រៅចំពោះ សម្តេច  និងលោកហ៊ុនម៉ាណែតជានាយករដ្ឋមន្រ្តីដើម្បីដឹកនាំរាជរដ្ឋាភិបាលកម្ពុជាសម្រាប់​អាណត្តិ​ទី៧ ឆ្នាំ២០២៣។ សម្ដេចក៏ជូនពរបងប្អូនជនរួមជាតិជួបតែសេចក្តីសុខនិង​សំណាងល្អ។គួរបញ្ជាក់ផងដែរថា បើតាមសារពិសេសជាសំឡេងកាលពីដើមសប្ដាហ៍នេះ សម្ដេចហ៊ុនសែនបានឱ្យដឹងថាបន្ទាប់ពីគណៈកម្មាធិការជាតិរៀបចំការបោះឆ្នោត​ប្រកាសលទ្ធផលផ្លូវការ នៃការបោះឆ្នោតជ្រើសតាំងតំណារាស្រ្ត នីតិកាលទី៧ កាល​បរិច្ឆេទនៃការប្រជុំសភាជាលើកដំបូង គឺព្រះមហាក្សត្រនិងកោះប្រជុំសភា នៅថ្ងៃទី២១ ខែ​សីហា ឆ្នាំ២០២៣ និងពេលល្ងាចនឹងមានការស្បថចូលកាន់ដំណែងរបស់​សមាជិក​សភា។ បន្ទាប់មក នៅថ្ងៃទី ២២ ខែសីហា ឆ្នាំ២០២៣ សភានឹងកោះប្រជុំក្រោមអធិបតីភាព​របស់​ព្រឹទ្ធបុរស ហើយពេលនោះក្បាលម៉ាស៊ីនរដ្ឋសភា និងក្បាលម៉ាស៊ីនរាជរដ្ឋាភិបាល នឹង​ត្រូវបង្កើតឡើងដែលនៅពេលល្ងាចគណៈរដ្ឋមន្ត្រីនឹងស្បថចូលកាន់ដំណែង៕AKP