សម្តេចនាយករដ្ឋមន្ត្រី ហ៊ុន សែន បានផ្ដែផ្ដាំលោក ហ៊ុន ម៉ាណែតកូនប្រុសច្បងដែលនឹងក្លាយជានាយករដ្ឋមន្ត្រីថ្មីថាពេលក្លាយជានាយករដ្ឋមន្ត្រីត្រូវតែការពារសន្តិភាពឱ្យខាងតែបានដើម្បីធានាដល់ការអភិវឌ្ឍនិងភាពសុខសាន្តរបស់ប្រជាជន។
 |
| សម្តេចនាយករដ្ឋមន្ត្រីហ៊ុន សែននៃប្រទេសកម្ពុជាបានគាំទ្រកូនប្រុសលោកហ៊ុន ម៉ាណែតឲ្យឡើងស្នងតំណែងពីសម្តេច។រូបភាពReuters |
សម្តេចបានសរសេរនៅលើបណ្ដាញសង្គម Twitter ពីថ្ងៃពុធថា វាជាការគាប់ជួននៅពេលដែលសម្តេចប្រកាសថាលោក ហ៊ុន ម៉ាណែត កូនប្រុសច្បងរបស់សម្តេចនឹងក្លាយជានាយករដ្ឋមន្រ្តីក្រោយសភាបោះឆ្នោតផ្តល់សេចក្តីទុកចិត្តសម្រាប់គណរដ្ឋមន្រ្តីនៅថ្ងៃ២២ ខែសីហា ឆ្នាំ២០២៣ ស្រាប់តែទូរទស្សន៍បាយ័នបានចាក់ផ្សាយរឿងកូនប្រុសក្រោមពន្លឺព្រះចន្ទពេញបូណ៍មីភាគ៧២គឺចំពេលដែលលោក ហ៊ុន ម៉ាណែត ចាកផ្ទៃម្តាយនៅថ្ងៃទី២០ ខែតុលា ឆ្នាំ១៩៧៧។សម្តេចបាននិយាយថា ជិវិតរបស់លោក ហ៊ុន ម៉ាណែត ពិតជាកម្សត់ណាស់ ។ប៉ុន្តែគាត់ជាមួយម្តាយបានខិតខំរស់ដើម្បីជួបជុំជាមួយសម្តេចវិញ។សម្តេចហ៊ុន សែន បានប្រាប់ទៅលោក ហ៊ុន ម៉ាណែត ថា៖ «ពេលកូនក្លាយជានាយករដ្ឋមន្រ្តីរបស់កម្ពុជាកូនត្រូវតែការពារឱ្យខាងតែបាននូវសន្តិភាព ដើម្បីធានាដល់ការអភិវឌ្ឍ និងភាពសុខសាន្តរបស់ប្រជាជន។សម្តេចនាយករដ្ឋមន្ត្រី ហ៊ុន សែន កាលពីថ្ងៃពុធបានប្រកាសក្នុងសន្និសីទកាសែតចេញពីគេហដ្ឋានរបស់សម្តេចថាសម្តេចនឹងមិនបន្តមុខតំណែងជានាយករដ្ឋមន្ត្រីក្នុងអាណត្តិទី៧នេះទេ ហើយលោកហ៊ុន ម៉ាណែត នឹងក្លាយជានាយករដ្ឋមន្រ្តីជំនួសសម្តេចនៅថ្ងៃ២២ ខែសីហា ឆ្នាំ២០២៣ ក្រោយសភាបោះឆ្នោតផ្តល់សេចក្តីទុកចិត្ត។លោក ហ៊ុន ម៉ាណែត បានសរសេរលើទំព័រហ្វេសប៊ុកផ្លូវការពីម្សិលមិញថា៖ «បណ្តាំរបស់ពុកដែលកូននឹងចងចាំជានិច្ចនិងប្តេជ្ញាអនុវត្តអោយបានដាច់ខាតនៅក្នុងគ្រប់កាលៈទេសៈ ពេលកូនក្លាយជានាយករដ្ឋមន្ត្រីរបស់កម្ពុជា»។លោក យង់ ពៅ អគ្គលេខាធិការនៃអគ្គលេខាធិការដ្ឋានរាជបណ្ឌិត្យសភាកម្ពុជា បានយល់ឃើញថា ការផ្ដាំផ្ញើរបស់នាយករដ្ឋមន្ត្រីបច្ចុប្បន្នទៅនាយករដ្ឋមន្ត្រីថ្មីក្នុងអាណត្តិទី៧នេះ ដោយផ្អែកលើទិដ្ឋភាពចំនួន៣សំខាន់ៗ គឺទិដ្ឋភាពប្រវត្តិសាស្ត្រកម្ពុជា ទិដ្ឋភាពនយោបាយជាក់ស្ដែង និងទិដ្ឋភាពអន្តរជាតិ។លោកបាននិយាយថា ផ្អែកលើទិដ្ឋភាពប្រវត្តិសាស្ត្រកម្ពុជា ដែលបានឆ្លងកាត់សង្គ្រាមវៀតណាម សង្គ្រាមត្រជាក់ ជាពិសេសសង្គ្រាមស៊ីវិលដែលទើបតែបិទបញ្ចប់ទាំងស្រុងនៅឆ្នាំ១៩៩៨។ ផ្អែកលើទិដ្ឋភាពប្រវត្តិសាស្ត្រនេះ កម្ពុជាបានរងគ្រោះហិនហោចនូវហេដ្ឋរចនាសម្ព័ន្ធរឹងនិងទន់ បាត់បង់ធនធានធម្មជាតិ ធនធានមនុស្ស ស្ទើរតែគ្មានសេសសល់អ្វី ហើយថែមទាំងខោចរួញទឹកដីទៅទៀត។លោកបន្តថា ផ្អែកលើទិដ្ឋភាពនយោបាយជាក់ស្ដែង(Real politics) ដែលប្រជាជនកម្ពុជាត្រូវការសុខសន្តិភាពជាចាំបាច់ដើម្បីបន្តការអភិវឌ្ឍ បន្តនិរន្តរភាពសង្គម បន្តមរតនយោបាយពីអ្នកជំនាញមុន ដែលបានខិតខំស្វែងរក និងការពារសន្តិភាពក្នុងពេលកន្លងមកបន្ទាប់ពីឯកភាពជាតិទាំងស្រុងក្នុងឆ្នាំ១៩៩៨ ហើយបានអភិវឌ្ឍដូចបច្ចុប្បន្ននេះ។លោកបានពន្យល់ថា៖ «នៅត្រង់ចំណុចនេះ ប្រសិនបើមានការធ្វេសប្រហែស នោះចលាចលនយោបាយនិងសង្គ្រាមនឹងវិលមកវិញជាមិនខាន ពីព្រោះប្រជាជននៅតែជឿតាមការញុះញង់ពីអ្នកនយោបាយដែលមិនគិតពីប្រយោជន៍ជាតិក្នុងបំណងប្រយោជន៍នយោបាយផ្ទាល់ខ្លួនគេ»។លោកបន្ថែមថា ចំណែកទិដ្ឋភាពអន្តរជាតិ គឺការប្រជែងឥទ្ធិពលភូមិសាស្ត្រនយោបាយរបស់មហាអំណាចនាំទៅដល់ការអូសប្រទេសតូចៗមួយចំនួនចូលក្នុងឧបសម្ព័ន្ធរៀងៗខ្លួន រួចហើយយកប្រទេសតូចៗទាំងនោះជាឈ្នាន់នៃសង្គ្រាម និងឈ្នាន់ដើម្បីភូមិសាស្ត្រនយោបាយ។ ដូច្នេះកម្ពុជាត្រូវធ្វើគោលនយោបាយការបរទេសយ៉ាងណាត្រូវអនុវត្តតាមរដ្ឋធម្មនុញ្ញរបស់កម្ពុជានិងអនុវត្តតាមច្បាប់អន្តរជាតិ ហើយគេចឱ្យផុតពីការប្រជែងឥទ្ធិពលភូមិសាស្ត្រនយោបាយ ដែលអាចអូសប្រទេសកម្ពុជាធ្លាក់ចូលក្នុងសង្គ្រាមឡើងវិញ។លោកបញ្ជាក់ថា ទំនងជាផ្អែកលើទិដ្ឋភាពទាំងនេះហើយ ដែលសម្តេចនាយករដ្ឋមន្ត្រី ហ៊ុន សែន ផ្ដាំផ្ញើលោក ហ៊ុន ម៉ាណែត កូនប្រុសច្បងរបស់សម្តេចដែលនឹងក្លាយនាយករដ្ឋមន្ត្រីថ្មីក្នុងអាណត្តិទី៧នាពេលខាងមុខ ដើម្បីការពារសន្តិភាពដែលបានពីការលះបង់ជីវិតប្តូរយកមក៕Khmer Times
/unnamed.png
Post a Comment