កម្ពុជា​កា​រ​ត្រៀមខ្លួន​​​​​​​​គឺល្អសម្រាប់​ពា​ន​រង្វាន់​​AFF U23​Cham​pions​hip2023

 គ្រូបង្គោលក្រុមបាល់ទាត់ជម្រើសជាតិកម្ពុជាលោក​​ Felix Dalmas បានថ្លែងក្នុងសន្និ​សីទសារ​ព័ត៌​មាន​កាលពីថ្ងៃទី១៦​ ខែសីហា​ ឆ្នាំ២០២៣​​ នៅប្រទេសថៃ​មុនការប្រកួតពានរង្វាន់យុវជន​អាស៊ាន​ក្រោម២៣ឆ្នាំ(AFF U23 Championship 2023)ថា​​​​សម្រាប់ការត្រៀមខ្លួន​របស់កម្ពុជា​​​​​គឺល្អ។ នេះ​ជា​ការលើកឡើងរបស់គ្រូបង្គោលកម្ពុជា​​ដែលជាជនជាតិអាហ្សង់ទីន​ ក្នុងសន្និសីទសារព័ត៌​មាន​រួម​គ្នា​មុនការប្រកួត​ប្រចាំពូលA។ 

រូបភាព៖​FFC/AKP

លោក​ Felix Dalmas​ គូសបញ្ជាក់ថា​៖ «ជាដំបូងសូមអរគុណដល់ម្ចាស់ផ្ទះ ថៃ ដែលបាន​រៀបចំទទួលពួកយើងបានល្អទាំងម្ហូបអាហារ និងកន្លែងស្នាក់នៅ។​ពួកយើងរីករាយ​ដែលបាន​មក​ទីនេះ ការត្រៀមខ្លួនគឺល្អ សម្រាប់កីឡាករកម្ពុជាជំនាន់ថ្មីរបស់យើង ហើយយើងរំភើបក្នុងការ​ប្រកួត​ម្ដងទៀតជាមួយក្រុមកំពូលក្នុងតំបន់។យើងមានការលំបាកបន្តិចដែរ សម្រាប់ការប្រមូលផ្តុំ​កីឡាករ ព្រោះពានរង្វាន់នេះមិនស្ថិតក្នុងថ្ងៃFIFA Day។ ដូច្នេះកីឡាករសំខាន់មួយ​ចំនួនបាន​អវត្តមាន ។ប៉ុន្តែពួកយើងក៏ទទួលបានកីឡាករថ្មីៗជាច្រើន ហើយពួកយើងរីករាយនឹង​កីឡាករ​ជំនាន់​ថ្មី របស់យើងដើម្បីឱ្យពួកគាត់បានបង្ហាញសមត្ថភាព ក្នុងពានរង្វាន់មួយនេះ»។សូមជម្រាបជូនថា AFF U23 Championship 2023)នៅប្រទេសថៃ ត្រូវដំណើរការប្រកួត​ចាប់ពីថ្ងៃទី១៧ ដល់ ២៦ ខែសីហា ឆ្នាំ២០២៣ ដោយមាន១០ប្រទេសចូលរួមនិងចែកជា៣ពូល។ ក្រុមU23 កម្ពុជានឹងត្រូវប្រកួតបើកឆាកមុនគេជាមួយក្រុមប្រ៊ុយណេ នៅក្នុងពូល A នៅកីឡដ្ឋាន Rayongប្រទេសថៃ នាថ្ងៃទី១៧ ខែសីហា។ បន្ទាប់មក ក្រមកម្ពុជានឹងបន្តប៉ះជាមួយមីយ៉ាន់ម៉ា នាថ្ងៃទី​១៩ ខែសីហា និងចុងក្រោយ ត្រូវជួបជាមួយ ក្រុមថៃ នាថ្ងៃទី២១ ខែសីហា ឆ្នាំ២០២៣។ យោងតាមរូបមន្តប្រកួតរបស់សហព័ន្ធកីឡាបាល់ទាត់អាស៊ាន-AFF គឺក្រោយបញ្ចប់ការប្រកួត​ក្នុង​ពូលគឺក្រុមចំណាត់ថ្នាក់លេខ១ នឹងត្រូវប៉ះក្រុមលេខ២ល្អផ្តាច់គេ ខណៈលេខ១ ពូល B នឹងត្រូវប៉ះ ក្រុមលេខ១ មកពីពូល C សម្រាប់វគ្គពាក់កណ្តាលផ្តាច់ព្រ័ត្រ។ ២ក្រុមដែលឈ្នះៗ នៅវគ្គពាក់​កណ្តាល​ផ្តាច់ព្រ័ត្រនឹងត្រូវឡើងទៅប្រជែងម្ចាស់ជើងឯកនាថ្ងៃទី២៦ ខែសីហា តែម្តង៕​AKP