អ៊ុយក្រែនទ​ទួ​ល​បានជំនួយជាង៦៦​​ពាន់លានដុល្លារពីស​​ហរដ្ឋអាមេរិក

 ជាមួយនឹងចំនួនទឹកប្រាក់សរុបជាង៦៦ពាន់លានដុល្លារអ៊ុយក្រែនបានក្លាយជាអ្នកទទួលជំនួយដ៏ធំបំផុតរបស់សហរដ្ឋអាមេរិកចាប់តាំងពីសង្គ្រាមលោកលើកទី២។យោងតាមស្ថិតិដែលចុះផ្សាយដោយកាសែត Washington Postបន្ទាប់ពីការវិភាគទិន្នន័យពីមន្ទីរបញ្ចកោណនិងក្រសួងការបរទេសសហរដ្ឋអាមេរិកចាប់តាំងពីសង្រ្គាមជាមួយរុស្ស៊ីបានផ្ទុះឡើងក្នុងខែកុម្ភៈ ឆ្នាំ ២០២២អ៊ុយក្រែនបានទទួលជំនួយសរុបចំនួន៦៦.២ពាន់លានដុល្លារអាមេរិក។ក្នុង​នោះ ៤៣,១ ពាន់​លាន​ដុល្លារ​ជា​ជំនួយ​យោធា​ផ្ទាល់ ជំនួយ​សេដ្ឋកិច្ច ២០,៥ ពាន់​លាន​ដុល្លារនិង​ជំនួយ​មនុស្សធម៌ ២,៦ ពាន់​លាន​ដុល្លារ។ វាគឺជាការវិនិយោគដ៏ធំបំផុតរបស់សហរដ្ឋអាមេរិកនៅក្នុងសម្ព័ន្ធមិត្ត ឬដៃគូចាប់តាំងពីសង្គ្រាមលោកលើកទី២។ក្នុងជំនួយផ្នែកយោធាដោយផ្ទាល់ សហរដ្ឋអាមេរិកបានផ្ទេរទៅឱ្យអ៊ុយក្រែននូវសព្វាវុធ និងបរិក្ខារយោធាដែលមានតម្លៃ ២៣,៥ ពាន់លានដុល្លារ និងជំនួយសន្តិសុខចំនួន ១៨ ពាន់លានដុល្លារ។ លើសពីនេះ ប្រទេសនេះក៏ផ្តល់ប្រាក់ឧបត្ថម្ភចំនួន១,៥ ពាន់លានដុល្លារ ដើម្បីទិញអាវុធផលិតដោយលោកខាងលិចផងដែរ។

ទាហានអ៊ុយក្រែនទទួលបានកាំជ្រួចការពារដែនអាកាសចល័ត FIM-92 Stinger នៅអាកាសយានដ្ឋានក្បែរទីក្រុងគៀវ ក្នុងខែកុម្ភៈ ឆ្នាំ២០២២។ រូបថត៖Reuters

ទោះបីជាជំនួយយោធាដល់អ៊ុយក្រែនមានចំនួនតិចតួចបើធៀបនឹងថវិកាការពារជាតិអាមេរិកជាង១.៧ពាន់ពាន់លានដុល្លារក៏ដោយ នេះនៅតែជាតួលេខគួរឱ្យចាប់អារម្មណ៍បើប្រៀបធៀបទៅនឹងជំនួយហិរញ្ញវត្ថុដែលប្រទេសផ្តល់ដល់សម្ព័ន្ធមិត្តផ្សេងទៀត។ នៅឆ្នាំ២០២២-២០២៣សហរដ្ឋអាមេរិកនឹងផ្ទេរប្រាក់ចំនួន៨.៦ពាន់លានដុល្លារទៅឱ្យអ៊ីស្រាអែល៣.៣ពាន់លានដុល្លារទៅអេហ្ស៊ីបនិង២.៩ពាន់លានដុល្លារទៅប្រទេសហ្ស៊កដានី។លោក Michael O'Hanlon មន្ត្រីជាន់ខ្ពស់នៅវិទ្យាស្ថាន Brookings ដែលមានមូលដ្ឋាននៅសហរដ្ឋអាមេរិកបាននិយាយថា "ទាំងនេះគឺជាចំនួនដ៏ច្រើន"ហើយបានប្រៀបធៀបជំនួយសរុបរបស់សហរដ្ឋអាមេរិកដល់អ៊ុយក្រែនជាមួយនឹងផែនការ Marshall របស់សហរដ្ឋអាមេរិក។ផែនការ Marshall គឺជាគំនិតផ្តួចផ្តើមមួយដើម្បីផ្តល់ជំនួយដល់អឺរ៉ុបខាងលិចបន្ទាប់ពីសង្គ្រាមលោកលើកទី២សម្រាប់រយៈពេល៣ឆ្នាំដែលមានតម្លៃប្រហែល១៥០ពាន់លានដុល្លារក្នុងតម្លៃបច្ចុប្បន្ន។សហរដ្ឋ​អាមេរិក​ជា​ប្រទេស​ដែល​ផ្តល់​ជំនួយ​ច្រើន​ជាង​គេ​ដល់​អ៊ុយក្រែន​ជា​ទូទៅ និង​ជា​ពិសេស​ផ្នែក​យោធា។ សហភាពអឺរ៉ុប (EU) ជាប់ចំណាត់ថ្នាក់លេខ២ដែលមានជំនួយសរុប ៣៥.៩ ពាន់លានដុល្លារអាមេរិក តាមពីក្រោយដោយចក្រភពអង់គ្លេស និងអាល្លឺម៉ង់ ១១.៧និង១១.៦ពាន់លានដុល្លារ។ បើ​និយាយ​ពី​ជំនួយ​យោធា អាល្លឺម៉ង់​ជាប់​ចំណាត់​ថ្នាក់​លេខ ២ បន្ទាប់​ពី​អាមេរិក តាម​ពីក្រោយ​ដោយ​អង់គ្លេស និង EU។ក្នុង​នាម​ជា​ចំណែក​នៃ GDP ប្រទេស​ដែល​ផ្តល់​ជំនួយ​ហិរញ្ញវត្ថុ​ធំ​បំផុត​ដល់​អ៊ុយក្រែន​គឺ​អេស្តូនី ឡាតវី និង​លីទុយអានី​ក្នុង​អត្រា១.២៦%, ១.០៩% និង 0.៩៥%។ សហរដ្ឋអាមេរិកជាប់ចំណាត់ថ្នាក់ទី១២ ក្នុងបញ្ជីនេះដោយមានការគាំទ្រស្មើនឹង 0.៣៣% នៃផលិតផលក្នុងស្រុកសរុប។អ្នកជំនាញ O'Hanlon បាននិយាយថា ជាមួយនឹងបរិមាណនៃការគាំទ្រដែលស្មើនឹងផ្នែកតូចមួយនៃ GDP សហរដ្ឋអាមេរិកអាចបន្តផ្តល់ជំនួយដល់អ៊ុយក្រែន "ដោយគ្មានកំណត់" ។ប៉ុន្តែនេះអាចនឹងត្រូវបានរារាំងដោយកត្តានយោបាយនៅក្នុងប្រទេស ជាពិសេសនៅពេលដែលសហរដ្ឋអាមេរិករៀបចំសម្រាប់ ការបោះឆ្នោតប្រធានាធិបតី។រុស្ស៊ីបាននិយាយម្តងហើយម្តងទៀតថា សព្វាវុធមានតម្លៃរាប់សិបពាន់លានដុល្លារដែលលោកខាងលិចផ្តល់ឲ្យអ៊ុយក្រែនមិនផ្លាស់ប្តូរស្ថានភាពនៃសង្រ្គាមនោះទេ។ វិមានក្រឹមឡាំងបានប្រកែកថាចំណាត់ការរបស់បស្ចិមលោកក្នុងការផ្គត់ផ្គង់សព្វាវុធ"គ្រាន់តែធ្វើឱ្យប្រជាជនអ៊ុយក្រែនរងទុក្ខ"ខណៈពេលដែលក្រុងគៀវទទូចថាអាវុធទាំងនេះគឺចាំបាច់ដើម្បីវាយលុករុស្ស៊ី៕ប្រភព WP