រដ្ឋាភិបាលចេញអនុក្រឹត្យ ឱ្យក្រសួង ស្ថាប័ន និងភាគីពាក់ព័ន្ធ រៀបចំផ្ទេរមុខងារក្នុងវិស័យអប់រំ យុវជន និងកីឡា ប្រគល់ទៅរដ្ឋបាលក្រុង ស្រុក ខណ្ឌ ទូទាំងប្រទេសមុនដំណាច់ឆ្នាំ២០២៣ ដើម្បីរដ្ឋបាលថ្នាក់ក្រោមជាតិ បន្តគ្រប់គ្រង និងអនុវត្តនៅដើមខែមករា ឆ្នាំ២០២៤។
 |
| សិស្សានុសិស្សថ្នាក់បឋមសិក្សាជ័យជំនះ។ រូបភាព៖ពុតសាម៉ាត់ |
ការផ្ទេរមុខងារក្នុងវិស័យអប់រំ យុវជន និងកីឡា ប្រគល់ទៅរដ្ឋបាលក្រុង ស្រុក ខណ្ឌ នៅទូទាំងប្រទេស ធ្វើឡើងបន្ទាប់រដ្ឋាភិបាលអនុវត្តសាកល្បងនៅរដ្ឋបាលក្រុង ស្រុក ក្នុងភូមិសាស្ត្រខេត្តបាត់ដំបង កាលពីឆ្នាំ២០១៦ រហូតដល់បច្ចុប្បន្ន គឺទទួលបានជោគជ័យ។ក្នុងអនុក្រឹត្យស្ដីពី ការផ្ទេរមុខងារក្នុងវិស័យអប់រំ យុវជន និងកីឡា ទៅឱ្យរដ្ឋបាលក្រុង ស្រុក ខណ្ឌ ដែលផ្សព្វផ្សាយលើបណ្ដាញសង្គមកាលពីម្សិលមិញ បានឱ្យដឹងថា ការផ្ទេរមុខងារលើវិស័យខាងលើនេះ ដើម្បីផ្ដល់សេវាអប់រំប្រកបដោយប្រសិទ្ធភាព គុណភាព គណនេយ្យភាព តម្លាភាព បរិយាប័ន្ន និងសមធម៌សង្គម តាមរយៈការបង្ខិតការសម្រេចចិត្ដ និងការទទួលខុសត្រូវក្នុងការគ្រប់គ្រងនៅថ្នាក់ក្រោមជាតិទូទាំងប្រទេស។អនុក្រឹត្យបញ្ជាក់ថា ការប្រគល់មុខងារក្នុងវិស័យអប់រំ ទៅឱ្យរដ្ឋបាលក្រុង ស្រុក ខណ្ឌ រួមមាន ទី១ មុខងារគ្រប់គ្រងការអប់រំកុមារតូច ទី២ មុខងារគ្រប់គ្រងការអប់រំបឋមសិក្សា និងទី៣ មុខងារគ្រប់គ្រងការអប់រំក្រៅប្រព័ន្ធ។អនុក្រឹត្យបន្ថែមថា គណៈកម្មាធិការជាតិសម្រាប់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ (គ.ជ.អ.ប.) គឺជាអ្នកដឹកនាំសម្របសម្រួលជាមួយក្រសួងសេដ្ឋកិច្ចនិងហិរញ្ញវត្ថុ ក្រសួងអប់រំ យុវជន និងកីឡា ក្រសួងមហាផ្ទៃ ក្រសួងមុខងារសាធារណៈ និងរដ្ឋបាលក្រុង ស្រុក ខណ្ឌ។ការដឹកនាំសម្របសម្រួលក្រសួងពាក់ព័ន្ធខាងលើនេះ ដើម្បីកំណត់អំពីទំហំ ធនធានហិរញ្ញវត្ថុ លក្ខខណ្ឌហិរញ្ញវត្ថុ លក្ខខណ្ឌបច្ចេកទេស និងលក្ខខណ្ឌផ្សេងៗទៀតដែលត្រូវផ្ទេរទៅឱ្យរដ្ឋបាលក្រុង ស្រុក ខណ្ឌ ដើម្បីគ្រប់គ្រង ចាត់ចែង និងប្រើប្រាស់សម្រាប់អនុវត្តមុខងារអប់រំ យុវជន និងកីឡាដែលបានប្រគល់ និងសម្រាប់គាំទ្រផ្នែករដ្ឋបាលដល់ការអនុវត្តមុខងារដែលបានប្រគល់។អនុក្រឹត្យបញ្ជាក់ថា៖ «ចំពោះបុគ្គលិកអប់រំដែលបានផ្ទេរទៅឱ្យរដ្ឋបាលក្រុង ស្រុក ខណ្ឌ ត្រូវមានលក្ខខណ្ឌការងារ បៀវត្ស និងប្រាក់ឧបត្ថម្ភផ្សេងៗមិនទាបជាងលក្ខខណ្ឌការងារ បៀវត្ស និងប្រាក់ឧបត្ថម្ភផ្សេងៗដែលបុគ្គលិកទាំង នោះធ្លាប់បានទទួលមុនការផ្ទេរនេះឡើយ»។អ្នកនាំពាក្យក្រសួងអប់រំ យុវជន និងកីឡា លោក រស់សុវាចា ប្រាប់កាសែតខ្មែរថាមស៍ កាលពីម្សិលមិញថា ការផ្ទេរមុខងារក្នុងវិស័យអប់រំនេះ ចំពោះគ្រឹះស្ថានមត្តេយ្យសិក្សា និងបឋមសិក្សាសាធារណៈ ព្រមទាំងមជ្ឈមណ្ឌលសិក្សាសហគមន៍ គឺត្រូវបញ្ចូលទៅក្នុងរចនាសម្ពន្ធនៃរដ្ឋបាលក្រុង ស្រុក ខណ្ឌនីមួយៗផងដែរ។លោកបន្ថែមថា សម្រាប់មុខតំណែងនានានៃរចនាសម្ពន្ធគ្រប់គ្រងបច្ចុប្បន្ន ក៏ត្រូវរក្សាកម្រិត និងឋានៈឱ្យនៅដដែល។លោកបញ្ជាក់ថា៖ «គ្រឹះស្ថានមត្តេយ្យសិក្សា បឋមសិក្សា និងមជ្ឈមណ្ឌលសិក្សាសហគមន៍ គឺស្ថិតនៅក្រោមការគ្រប់គ្រងរបស់ការិយាល័យអប់រំ យុវជន និងកីឡា ដែលជាសេនាធិការឱ្យរដ្ឋបាលក្រុង ស្រុក ខណ្ឌ»។លោក ចាន់ សុធា អនុរដ្ឋលេខាធិការក្រសួងមហាផ្ទៃ និងជាអនុប្រធានលេខាធិការដ្ឋាន គ.ជ.អ.ប. បានឱ្យដឹងថា ក្នុងក្របខណ្ឌនៃកំណែទម្រង់វិមជ្ឈការ និងវិសហមជ្ឈការ វិស័យអប់រំត្រូវបានកំណត់ថា ជាវិស័យអាទិភាពមួយដែលច្បាប់ស្តីពី ការគ្រប់គ្រងរដ្ឋបាលរាជធានី ខេត្ត ក្រុង ស្រុក ខណ្ឌ បានតម្រូវឱ្យមានការផ្ទេរមុខងារ និងការទទួលខុសត្រូវក្នុងវិស័យអប់រំទៅឱ្យរដ្ឋបាលថ្នាក់ក្រោមជាតិ។លោកបន្ថែមថា ការផ្ទេរមុខងារទៅថ្នាក់ក្រោមជាតិនេះ គឺធ្វើឱ្យប្រសើរនូវគុណភាពសេវាអប់រំ ជាពិសេសសេវាអប់រំកុមារតូច សេវាអប់រំបឋមសិក្សា សេវាអប់រំក្រៅប្រព័ន្ធ និងការអភិវឌ្ឍយុវជន តាមរយៈបង្ខិតការធ្វើសម្រេចចិត្ត និងទទួលខុសទៅឱ្យថ្នាក់ក្រោមជាតិ ដែលនៅកៀកប្រជាពលរដ្ឋតាមមូលដ្ឋាន។លោក ចាន់ សុធា៖ «កាលពីដើមឆ្នាំ២០២៣ គ.ជ.អ.ប. បង្កើតក្រុមការងារអន្តរក្រសួងមួយ ដើម្បីសិក្សាវាយតម្លៃលើការអនុវត្តមុខងារអប់រំ ដែលត្រូវផ្ទេរទៅឱ្យរដ្ឋបាលក្រុង ស្រុក ខណ្ឌ។ ការសិក្សាវាយតម្លៃបានបង្ហាញថា មានលទ្ធផលល្អប្រសើរ»។ប្រធានមន្ទីរអប់រំ យុវជន និងកីឡា ខេត្តបាត់ដំបង លោក យី សុងគី ធ្លាប់ឱ្យដឹងថា ខេត្តបាត់ដំបង គឺជាខេត្តគំរូមួយត្រូវបានរដ្ឋាភិបាលជ្រើសរើស ដើម្បីអនុវត្តផ្ទេរមុខងារពីថ្នាក់ជាតិ ទម្លាក់មកថ្នាក់ក្រោមជាតិ ជាពិសេស ផ្ទេរមុខងារទៅឱ្យរដ្ឋបាល ក្រុង ស្រុក ដោយចាប់ផ្ដើមពីកម្រិតមត្តេយ្យសិក្សា បឋមសិក្សា និងមជ្ឈមណ្ឌលអប់រំក្រៅប្រព័ន្ធ។លោកបន្ថែមថា ការផ្ទេរមុខងារនេះ គឺផ្ទេរទាំងបុគ្គលិក ទាំងការគ្រប់គ្រងលើបុគ្គលិក ផ្ទេរទាំងថវិកា និងផ្ទេរទាំងទ្រព្យសម្បត្តិរបស់រដ្ឋ។ប្រធានមន្ទីរបញ្ជាក់ថា៖ «ការផ្ទេរពីថ្នាក់ជាតិ មកថ្នាក់ក្រោមជាតិ រដ្ឋបាលឃុំសង្កាត់ ក៏បានរួមចំណែកផ្ដល់ថវិកាមួយចំនួន ដើម្បីអភិវឌ្ឍសាលារៀននៅតាមមូលដ្ឋានរបស់ខ្លួនផងដែរ គឺមានដូចជា ធ្វើផ្លូវបេតុង ជួសជុលអគារសិក្សា ឬធ្វើបង្គន់អនាម័យ ជាដើម»។លោកថា ការផ្ទេរមុខងារអប់រំមកថ្នាក់ក្រោមជាតិ មានភាពងាយស្រួលដល់បុគ្គលិកអប់រំ ព្រោះបើមានបញ្ហា ឬចង់ស្នើសុំច្បាប់ ឬសុំលម្ហែមាតុភាព ឬក៏ដំឡើងកាំប្រាក់ គឺធ្វើឡើងត្រឹម ក្រុង ស្រុក គឺមិនចាំបាច់ឡើងដល់មន្ទីរអប់រំ យុវជន និងកីឡាខេត្ត នោះទេ៕Khmer Times
/unnamed.png
Post a Comment