លោកហ៊ុន ម៉ាណែត បេក្ខភាពនាយករដ្ឋមន្ត្រីដើមអាណត្តិនីតិកាលទី៧ នៃរដ្ឋសភាបានលើកឡើងថាសមិទ្ធផលធំបំផុតរបស់កម្ពុជាគឺជាធនធានមនុស្សប្រកបដោយសក្ដានុពលដើម្បីរួមចំណែកអភិវឌ្ឍប្រទេសជាតិឱ្យកាន់តែរីកចម្រើននិងជឿនលឿន។
 |
| លោកហ៊ុន ម៉ាណែត បេក្ខភាពនាយករដ្ឋមន្ត្រីដើមអាណត្តិនីតិកាលទី៧ នៃរដ្ឋសភា។រូបភាពផេកHunmanet |
លោកបន្ថែមថាសម្រាប់រដ្ឋាភិបាលនីតិកាលទី៧ នៃរដ្ឋសភា នឹងនៅតែបន្តផ្ដល់អាទិភាពជាចម្បងក្នុងការវិនិយោគវិស័យអប់រំ ដើម្បីលើកកម្ពស់គុណភាពអប់រំនៅកម្ពុជា។ក្នុងវីដេអូឃ្លីបប្រមាណជាង ២នាទី ដែលបានបង្ហោះនៅលើបណ្ដាញសង្គមរបស់លោក ហ៊ុន ម៉ាណែត កាលពីម្សិលមិញបញ្ជាក់ថា ទោះកម្ពុជាមានអគារទំហំ ១០០ជាន់ ឬ ២០០ជាន់ ក៏មិនសំខាន់ប៉ុន្មានដែរ។ប៉ុន្តែលទ្ធភាពធ្វើអគារបានទំហំ ១០០ជាន់ ឬ ២០០ជាន់ ដោយខ្លួនឯងទើបជារឿងសំខាន់។លោកបន្ថែមថា ទោះមានថវិកាទិញកុំព្យូទ័រគឺមិនសំខាន់ដូចទៅនឹងអ្នកដែលមានលទ្ធភាពបង្កើតកុំព្យូទ័រ ចេះប្រើប្រាស់កុំព្យូទ័រ និងចេះធ្វើកម្មវិធីកុំព្យូទ័រដោយខ្លួនឯងនោះទេ។លោកបន្តថា សម័យមុនៗមនុស្សភាគច្រើនគ្មានឱកាសរៀនសូត្របានខ្ពង់ខ្ពស់នោះទេ។ប៉ុន្តែដោយសារបច្ចុប្បន្នមានការរីកចម្រើនច្រើន ដែលបង្កលក្ខណៈងាយស្រួលដល់យុវជនឱ្យមានឱកាសរៀនបញ្ចប់ថ្នាក់បរិញ្ញាបត្រ បរិញ្ញាបត្រជាន់ខ្ពស់ និងថ្នាក់បណ្ឌិត។លោក ហ៊ុន ម៉ាណែត ថ្លែងថា បច្ចុប្បន្ន យុវជនមានឱកាសសិក្សារៀនសូត្រខ្ពង់ខ្ពស់ទាំងនេះ គឺដោយសារប្រឹងប្រែងបង្កើតសមិទ្ធរួមគ្នាសម្រាប់កសាងប្រទេសជាតិពីបាតដៃទទេ ដើម្បីថែរក្សាសុខសន្តិភាព និងរួមគ្នាកសាងប្រព័ន្ធអប់រំឡើងវិញ។បេក្ខភាពនាយករដ្ឋមន្ត្រីបញ្ជាក់ថា៖ «ការបណ្តុះបណ្តាលធនធានមនុស្ស [,,,] ក្នុងប្រទេសរបស់យើង [,,,] អ្វីដែលសំខាន់ធំបំផុត គឺធនធានមនុស្សដែលមានសមត្ថភាព មានគុណធម៌ សីលធម៌ សម្រាប់ពង្រឹងប្រទេសជាតិរបស់យើង [,,,]។លោកបន្ថែមថា ចំពោះនិស្សិតដែលបញ្ចប់ការសិក្សា គឺប្រៀបដូចជា សសរ សម្រាប់ប្រទេសជាតិ ហើយប្រទេសជាតិត្រូវការសសរ ដែលរឹងមាំទាំង សុខភាព សមត្ថភាព និងចំណេះដឹង ហើយ សសរ ដែលបណ្តុះបណ្តាលជំនាន់ក្រោយៗកាន់តែរឹងមាំថែមទៀត ដើម្បីទ្រទ្រង់នូវប្រទេសជាតិឱ្យកាន់តែរឹងមាំ។លោក យង់ ពៅ អគ្គលេខាធិការដ្ឋាននៃរាជបណ្ឌិត្យសភាកម្ពុជា បានឱ្យដឹងថា ផ្អែកលើទិដ្ឋភាពប្រវត្តិសាស្ត្រ កម្ពុជាបានឆ្លងកាត់សង្គ្រាមវៀតណាម សង្គ្រាមត្រជាក់ ជាពិសេសសង្គ្រាមស៊ីវិល ដែលទើបតែបញ្ចប់ទាំងស្រុងកាលពីឆ្នាំ១៩៩៨។លោកបន្ថែមថា ទិដ្ឋភាពទាំងនេះ កម្ពុជាបានរងគ្រោះច្រើនស្ទើរគ្រប់វិស័យ ជាពិសេសវិស័យអប់រំ សុខាភិបាល និងហេដ្ឋរចនាសម្ពន្ធនានាទាំងផ្នែករឹង និងទន់ ព្រមទាំងបាត់បង់ធនធានធម្មជាតិ និងធនធានមនុស្ស ស្ទើរតែគ្មានសេសសល់ ថែមទាំងខាតបង់ទឹកដីមួយចំនួនផងដែរ។លោកបន្តថា បើផ្អែកលើទិដ្ឋភាពនយោបាយ (Real politics) ប្រជាជនកម្ពុជាត្រូវការសុខសន្តិភាពជាចាំបាច់ ដើម្បីបន្តអភិវឌ្ឍគ្រប់វិស័យ បន្តនិរន្តរភាពសង្គម បន្តមរតកនយោបាយពីអ្នកជំនាន់មុន ដែលបានខិតខំស្វែងរក និងការពារសន្តិភាព បន្ទាប់ពីឯកភាពជាតិទាំងស្រុងកាលពីឆ្នាំ១៩៩៨ ដែលកម្ពុជាទទួលបានការអភិវឌ្ឍដូចបច្ចុប្បន្ន។លោក យង់ ពៅ បន្ថែមថា ការវិនិយោគលើវិស័យអប់រំ ដើម្បីកសាងធនធានមនុស្សឱ្យមានគុណភាព និងប្រសិទ្ធភាព សម្រាប់អភិវឌ្ឍប្រទេសជាតិ គឺជារឿងសំខាន់បំផុតសម្រាប់កម្ពុជា ក៏ដូចរដ្ឋាភិបាលក្នុងអាណត្តិនីមួយៗ។កាលពីខែកក្កដា លោក ហ៊ុន ម៉ាណែត ធ្លាប់បញ្ជាក់ថា ការអភិវឌ្ឍក្នុងវិស័យណាមួយ ត្រូវយកចិត្តទុកដាក់ខ្ពស់លើការផ្តល់ឱកាស និងអត្ថប្រយោជន៍រួមដល់ប្រជាពលរដ្ឋទូទៅ។លោកបន្ថែមថា ការអភិឌ្ឍ តែងធ្វើឱ្យប៉ះពាល់ តែប៉ះពាល់តែងគិតគូពីប្រជាពលរដ្ឋជាមុន និងដោះស្រាយតាមគោលនយោបាយ ដើម្បីអភិវឌ្ឍឱ្យមានភាពល្អប្រសើរ មិនមែនសម្រាប់តែដើម្បីល្អមើលនោះទេ។បេក្ខភាពនាយករដ្ឋមន្ត្រីបញ្ជាក់ថា ការអភិវឌ្ឍក្នុងវិស័យនីមួយៗ មិនមែនសម្រាប់ប្រើប្រាស់តែវិស័យឯកជន ឬបុគ្គលនោះទេ តែសម្រាប់ប្រជាពលកម្ពុជា និងប្រយោជន៍ជាតិទាំងមូល៕ Khmer Times
/unnamed.png
Post a Comment