រដ្ឋមន្ត្រី​កា​រ​ប​រទេស​ចិន​ម​ក​​រុស្ស៊ី​ដើម្បី​ពិភា​ក្សា​អំ​ពី​សន្តិសុខ

 រដ្ឋមន្ត្រីការបរទេសចិនលោកWangYiបានទៅបំពេញទស្សនកិច្ចនៅប្រទេសរុស្ស៊ីរយៈពេល៤ថ្ងៃដើម្បីពិភាក្សាអំពីសន្តិសុខក្នុងតំបន់ក៏ដូចជាបញ្ហាទាក់ទងនឹងដំណោះស្រាយនៅអ៊ុយក្រែន។ក្រសួងការបរទេសចិននៅថ្ងៃនេះបាននិយាយថាក្នុងដំណើរទស្សនកិច្ចរយៈពេល៤ថ្ងៃរបស់លោកដែលចាប់ផ្តើមនៅថ្ងៃទី១៨ខែកញ្ញាលោក Wang Yi នឹងចូលរួមក្នុងការពិគ្រោះយោបល់សន្តិសុខជាយុទ្ធសាស្រ្តប្រចាំឆ្នាំជាមួយលេខាធិការក្រុមប្រឹក្សាសន្តិសុខរុស្ស៊ី Nikolai Patrushev ។

រដ្ឋមន្ត្រី​ការបរទេស​ចិន លោកWangYi។ រូបថត៖Reuters

ទីក្រុងប៉េកាំងបាននិយាយថានេះគឺជា "ព្រឹត្តិការណ៍ធម្មតា" សំដៅ "លើកកម្ពស់ទំនាក់ទំនងទ្វេភាគីនិងការផ្លាស់ប្តូរស៊ីជម្រៅលើបញ្ហាសំខាន់ៗដែលទាក់ទងនឹងផលប្រយោជន៍សន្តិសុខជាយុទ្ធសាស្ត្រនៃប្រទេសទាំង២"។ក្រសួងការបរទេសរុស្ស៊ីបាននិយាយកាលពីសប្តាហ៍មុនថាលោកWang នឹងជួបសមភាគីរបស់លោកSergeyLavrovហើយថារដ្ឋមន្ត្រីការបរទេសទាំង២មានគោលបំណង"ផ្តោតលើកិច្ចខិតខំប្រឹងប្រែងដើម្បីពង្រឹងកិច្ចសហប្រតិបត្តិការនៅក្នុងឆាកអន្តរជាតិ" ។យោងតាមក្រសួងការពិភាក្សារវាងមន្ត្រីទាំង២ក៏នឹងគ្របដណ្តប់លើ "បញ្ហាជាបន្តបន្ទាប់" រួមទាំង "ទំនាក់ទំនងនៅកម្រិតខ្ពស់បំផុត" ។អ្នកនាំពាក្យក្រសួងការបរទេសរុស្ស៊ី Maria Zakharova បាននិយាយថា "នឹងមានការផ្លាស់ប្តូរទស្សនៈលម្អិតអំពីបញ្ហាទាក់ទងនឹងដំណោះស្រាយក្នុងប្រទេសអ៊ុយក្រែនក៏ដូចជាមធ្យោបាយដើម្បីធានាស្ថិរភាព និងសន្តិសុខនៅក្នុងតំបន់អាស៊ីប៉ាស៊ីហ្វិក"។នេះគឺជាដំណើរចុងក្រោយបង្អស់ក្នុងទំនាក់ទំនងកម្រិតខ្ពស់រវាងភាគីទាំង២ហើយត្រូវបានគេនិយាយថាជាមូលដ្ឋានគ្រឹះសម្រាប់ដំណើរទស្សនកិច្ចរបស់ប្រធានាធិបតីរុស្ស៊ីលោក VladimirPutinទៅកាន់ប្រទេសចិន។ទីប្រឹក្សាវិមានក្រឹមឡាំងបាននិយាយថា លោកពូទីនគ្រោងនឹងមកប្រទេសចិនក្នុងខែតុលានៅពេលដែលវេទិកាខ្សែក្រវ៉ាត់និងផ្លូវត្រូវបានប្រារព្ធឡើង។ចិននិងរុស្ស៊ីគឺជាសម្ព័ន្ធមិត្តយុទ្ធសាស្ត្រ ដែលតែងតែលើកកម្ពស់ភាពជាដៃគូ"គ្មានដែនកំណត់"ក៏ដូចជាកិច្ចសហប្រតិបត្តិការសេដ្ឋកិច្ចនិងយោធា។ កាលពីខែមុន រដ្ឋមន្ត្រីការពារជាតិចិន លោក Li Shangfu បានទៅបំពេញទស្សនកិច្ចនៅប្រទេសរុស្ស៊ី និងបេឡារុស្ស ដោយអំពាវនាវឱ្យមានកិច្ចសហប្រតិបត្តិការយោធាកាន់តែជិតស្និទ្ធ។ ក្នុង​រយៈពេល​ប៉ុន្មាន​ខែ​ថ្មីៗ​នេះ ប្រទេស​ទាំង២បាន​ធ្វើ​ការ​ល្បាត​រួម​នៅ​សមុទ្រ និង​លើ​អាកាស។កាលពីខែមីនា ប្រធានាធិបតីចិន លោក Xi Jinping បានបំពេញទស្សនកិច្ចផ្លូវរដ្ឋទៅកាន់ប្រទេសរុស្ស៊ី ហើយបានប្រកាសថា ទំនាក់ទំនងទ្វេភាគីបានឈានចូលយុគសម័យថ្មីមួយ។នៅឯវេទិកាសេដ្ឋកិច្ចបូព៌ាប្រចាំឆ្នាំនៅទីក្រុង Vladivostok កាលពីសប្តាហ៍មុន ប្រធានាធិបតីរុស្ស៊ីបានប្រាប់ឧបនាយករដ្ឋមន្ត្រីចិនលោក Zhang Guoqing ថាទំនាក់ទំនងទ្វេភាគី"បានឈានដល់កម្រិតមួយដែលមិនធ្លាប់មានក្នុងប្រវត្តិសាស្ត្រ" ។ប្រទេសចិនគឺជាដៃគូពាណិជ្ជកម្មដ៏ធំបំផុតរបស់រុស្ស៊ី ជាមួយនឹងទំហំប្រតិបត្តិការកាលពីឆ្នាំមុនឈានដល់១៤៧ពាន់លានដុល្លារអាមេរិក កើនឡើងជាង៣០% បើប្រៀបធៀបទៅនឹងឆ្នាំ២០១៩ ។អ្នកជំនាញនិយាយថា រុស្ស៊ី និងចិនកំពុងខិតជិតគ្នា ចំពេលមានភាពតានតឹងកើនឡើងជាមួយលោកខាងលិច។មន្ត្រីលោកខាងលិចជាច្រើនជឿថាភាពជាដៃគូជាមួយចិន គឺជាកត្តាសំខាន់មួយ ដែលជួយរុស្ស៊ីទប់ទល់នឹងទណ្ឌកម្មជាបន្តបន្ទាប់ដែលមិនធ្លាប់មានពីមុនមក៕ប្រភពAFP,Reuters