នាយក​​​រដ្ឋមន្ត្រី​អ៊ីស្រាអែ​ល​​បា​ន​លាតត្រដាង​ថា​លោក​នឹង​ប្តូរ​ការ​ផ្តោត​លើ​​ជម្លោះ​ទៅ​​ប្រទេស​​លីបង់

 នាយករដ្ឋមន្ត្រីអ៊ីស្រាអែលបានប្រកាសថា"ដំណាក់កាលតានតឹង" នៃជម្លោះជាមួយចលនាអ៊ីស្លាមនិយមហាម៉ាស់នៅតំបន់ហ្គាហ្សាស្ទ្រីប "គ្រោងនឹងបញ្ចប់"ហើយថាការផ្តោតអារម្មណ៍របស់កងទ័ពរបស់ប្រទេសនេះអាចផ្លាស់ប្តូរទៅព្រំដែនជាមួយលីបង់។នាយករដ្ឋមន្ត្រីអ៊ីស្រាអែល លោក Benjamin Netanyahuបានពន្យល់ថា"នោះមិនមានន័យថា ជម្លោះនឹងបញ្ចប់នោះទេ។ប៉ុន្តែជម្លោះនៅដំណាក់កាលបច្ចុប្បន្នរបស់វានឹងបញ្ចប់នៅRafah... យើងនឹងបន្តលុបបំបាត់អរិភាព"។ទូរទស្សន៍​ជាតិ​ថ្ងៃ​ទី​២៣ មិថុនា។លោក Netanyahu ក៏បាននិយាយថា លោកមានឆន្ទៈក្នុងការធ្វើ"កិច្ចព្រមព្រៀងមួយផ្នែក"ជាមួយក្រុមហាម៉ាស់ ដើម្បីធានានូវសេរីភាពនៃចំណាប់ខ្មាំងមួយចំនួន។ទោះបីជាយ៉ាងណាក៏ដោយលោកបានរំលឹកឡើងវិញនូវជំហរដ៏យូរអង្វែងរបស់លោកថាអ៊ីស្រាអែលនឹងបន្តយុទ្ធនាការយោធារបស់ខ្លួនបន្ទាប់ពីបទឈប់បាញ់"ដើម្បីសម្រេចបាននូវគោលដៅនៃការលុបបំបាត់"ក្រុមប្រដាប់អាវុធមូស្លីមប៉ាឡេស្ទីន។

ទីភ្នាក់ងារសារព័ត៌មានCNNបានដកស្រង់សម្តីមេដឹកនាំរដ្ឋាភិបាលអ៊ីស្រាអែលដោយបន្ថែមថា“បន្ទាប់ពីបញ្ចប់រយៈពេលនៃជម្លោះដ៏ខ្លាំងក្លាជាមួយក្រុមហាម៉ាស់យើងអាចផ្លាស់ប្តូរការផ្តោតអារម្មណ៍របស់យើងទៅកាន់តំបន់ព្រំដែនភាគខាងជើងជាមួយប្រទេសលីបង់។ទីមួយ​ក្នុង​គោល​បំណង​ការពារ និង​ទី​ពីរ​ដើម្បី​អនុញ្ញាត​ឱ្យ​អ្នក​ស្រុក​ត្រឡប់​ទៅ​ផ្ទះ​វិញ។ បើ​យើង​អាច​ធ្វើ​វា​តាម​បែប​នយោបាយ នោះ​ជា​រឿង​អស្ចារ្យ។ បើ​មិន​ដូច្នោះ​ទេ យើង​នឹង​ធ្វើ​វា​តាម​វិធី​ផ្សេង»។ក្រុមអ៊ីស្លាមនិយមលីបង់ហេសបូឡា ដែលជាក្រុមប្រដាប់អាវុធគាំទ្រដោយអ៊ីរ៉ង់ដ៏មានឥទ្ធិពលបំផុតនៅមជ្ឈិមបូព៌ាបានចូលរួមក្នុងការប្រយុទ្ធគ្នាស្ទើរតែរាល់ថ្ងៃជាមួយយោធាអ៊ីស្រាអែល បន្ទាប់ពីជម្លោះអ៊ីស្រាអែលនិងហាម៉ាស់បានផ្ទុះឡើងក្នុងខែតុលា ឆ្នាំ ២០២៣ ។ហេសបូឡាអះអាងថាគោលដៅរបស់ខ្លួនគឺគាំទ្រប៉ាឡេស្ទីន។ទីក្រុង Tel Avivបានឆ្លើយតបទៅនឹងការវាយប្រហាររបស់ពួកហេសបូឡា ជាមួយនឹងការវាយឆ្មក់ក្នុងគោលបំណងលុបបំបាត់យុទ្ធជនរបស់ក្រុម រួមទាំងមេបញ្ជាការជាន់ខ្ពស់ផងដែរ។ប្រជាជនអ៊ីស្រាអែលរាប់ម៉ឺននាក់ត្រូវបានជម្លៀសចេញពីភាគខាងជើងនៃប្រទេសដោយសារតែការប្រយុទ្ធគ្នាដែលកំពុងបន្ត។នៅក្នុងបទសម្ភាសន៍ថ្មីមួយនៅពេលត្រូវបានសួរថាតើដំណោះស្រាយរបស់លោកក្នុងការបញ្ចប់ជម្លោះជាមួយក្រុមហេសបូឡាគឺតាមរយៈផ្នែកការទូតឬកម្លាំងយោធានោះ Netanyahu បានឆ្លើយតបថា "ប្រសិនបើមានកិច្ចព្រមព្រៀងវានឹងជាកិច្ចព្រមព្រៀងនៅក្រោមលក្ខខណ្ឌរបស់យើង"៕ពុតសាម៉ាត់