សម្ដេចហ៊ុន សែនលើកឡើងថាការចាក​ចេញពីតំ​ណែង​នាយករដ្ឋមន្ត្រី​គឺជាការលះប​ង់ដើម្បីសន្តិភាពភាព​សុខសាន្ត​និងការអ​ភិវឌ្ឍរយៈពេល​វែងនៅកម្ពុជា

សម្ដេចហ៊ុន សែននាយករដ្ឋមន្រ្តីនៃកម្ពុជាមាន​ប្រសា​ស​ន៍​ថាការចាកចេញពីតំណែងនាយករដ្ឋមន្ត្រីរបស់សម្ដេចក្នុងអាណត្តិ នីតិកាលទី៧នេះហើយ​ឱ្យអ្នកជំនាន់ក្រោយឡើងមកដឹកនាំ គឺដើម្បីធានានូវសន្តិភាព ភាពសុខសាន្ត និង​ការ​អភិវឌ្ឍរយៈពេលវែងនៅកម្ពុជា។

ក្នុងពិធីសម្ពោធដាក់ប្រើប្រាស់ផ្លូវក្រវាត់ក្រុងទី៣  នាព្រឹកថ្ងៃទី០៣ ខែសីហា ឆ្នាំ២០២៣ នៅស្រុកកៀនស្វាយ ខេត្តកណ្ដាល សម្ដេចហ៊ុន សែន បានថ្លែងរម្លឹកថា  សម្តេចធ្លាប់បានលះបង់យកជីវិតធ្វើដើម្បីទុនដើម្បីរំដោះប្រទេស ធ្លាប់បានយកជីវិតធ្វើ​ដើម​ទុន​ដើម្បីបង្រួបបង្រួមជាតិ ដែលមិនចេះចប់មិនចេះហើយ ព្រមទាំងយកជីវិតនយោ​បាយ​របស់សម្តេច ធ្វើជាដើមទុន នៃកំណែទម្រង់នយោបាយ និងសេដ្ឋកិច្ចនៅកម្ពុជា​ជាដើម។ សម្ដេចតេជោបានថ្លែងថា៖«ខ្ញុំបានលះបង់ហើយឥឡូវខ្ញុំចង់លះបង់សារជាថ្មី​ម្តង​ទៀតដើម្បីសេចក្តីសុខរយៈពេលវែងរបស់ប្រជាជនយ៉ាងហោចមានមូលហេតុ៤យ៉ាងដែលខ្ញុំគួរតែជម្រាបជូនចំពោះប្រជាពលរដ្ឋ»។ សម្តេចនាយករដ្ឋមន្ត្រីបាន​លើកឡើង​ថាការផ្ទេរឱ្យយុវជនពេលនេះ មានស្ថិរភាពជាងពេលដែលសម្តេចក៏ដូចជាមាន​មន្រ្តី​ជាន់ខ្ពស់គណបក្សប្រជាជនកម្ពុជាកាន់តំណែងរហូតដល់ចាស់ស្លាប់។ សម្តេចបានថ្លែងបន្តថាតើមាននាយករដ្ឋមន្ត្រីប៉ុន្មាននាក់ ដែលធ្លាប់បានលះបង់អំណាចដូចសម្តេចក្នុងពេលដែល​ខ្លួនមានលទ្ធភាព ធ្វើនាយករដ្ឋមន្ត្រីបាន៥ទៅ១០ឆ្នាំទៀត។ប៉ុន្តែមិនមែនវាជារឿងល្អទេ នៅពេលដែលកាន់តំណែងរហូតដល់ចាស់ស្លាប់។សម្តេចនាយករដ្ឋមន្រ្ដីបានបញ្ជាក់ថាការរៀបចំផ្ទេរតំណែងបន្តវេនរបស់​សម្តេចនាពេលនេះ គឺយកតាមព្រះរាជគំរូរបស់ព្រះបរមរតនកោដ្ឋដោយសម្ដេចបានចោទសួរថា ក្នុងប្រវត្តិសាស្ត្រកម្ពុជា មានមេដឹកនាំរូបណាខ្លះ ស្ម័គ្រចិត្តបោះ​បង់​តំណែង​នោះ។ ដូច្នេះការប្រគល់តួនាទីឱ្យក្រុមយុវជនជំនាន់ក្រោយនាពេលនេះ ជាពេល​វេលាដ៏ស័ក្តិសមសម្រាប់ការធានាបានសុខសន្តិភាព និងការអភិវឌ្ឍរបស់កម្ពុជា។ សម្តេច​គូសបញ្ជាក់ទៀតថា  យោងទៅលើលក្ខខណ្ឌនិងលក្ខណៈសម្បត្តិ ក៏ដូចជាសភាព​ការណ៍អំណោយផល គណៈអចិន្រ្តៃយ៍គណបក្សបានសម្រេចជ្រើសរើស សេណារីយ៉ូទី២ គឺឱ្យរដ្ឋាភិបាលថ្មីនេះ ចេញដំណើរពីដើមទីតែម្តង ដោយមិនចាំបាច់មានអន្តរ​កាលមួយ​ដោយអ្នកចាស់ទេ។ ធ្វើយ៉ាងនេះដើម្បីយើងផ្តល់អំណាចពេញលេញឱ្យអ្នកបន្តវេន គេមាន​លទ្ធភាពធ្វើកិច្ចការរបស់គេពេញមួយអាណត្តិតែម្តងហើយសម្ដេចនឹងមិនព្យាយាម ក្នុង​ការ​ជះឥទ្ធិពលទៅលើការសម្រេចចិត្តរបស់នាយករដ្ឋមន្ត្រី របស់រដ្ឋមន្ត្រីនានាតាមស្ថាប័ន​នោះទេនិងនិយាយជារួមមិនព្យាយាមជះឥទ្ធិពលទៅលើការសម្រេច​ចិត្តរបស់រាជរដ្ឋាភិ​បាល ដែលជាអ្នកបន្តវេននោះឡើយ។សម្តេចហ៊ុន សែន បានគូសបញ្ជាក់បន្ថែមថា ដោយមានបទពិសោធន៍​ធ្លាប់​ធ្វើ​ជាយករដ្ឋមន្ត្រី ដោយមិនមែនជាប្រធានគណបក្ស សម្តេចនឹងធ្វើឱ្យអ្នកបន្តវេនពីសម្តេចទទួលបាននូវភាពឯករាជ្យក្នុងការធ្វើការសម្រេច ហើយការសម្រេចនោះគឺមិនឱ្យខុសពី​គោល​នយោបាយរបស់គណបក្សដែលបានដាក់ការសន្យាចំពោះម្ចាស់ឆ្នោតដែល​បានបោះ​​ឆ្នោតឱ្យនោះទេដោយត្រូវតែយកទៅច្នៃប្រឌិតឱ្យមានការអភិវឌ្ឍកាន់តែជឿន​លឿន​៕AKP