ល្បែងស៊ី​ស​ងតាមអនឡាញចាប់ផ្ដើមងើប​ឡើងវិញនៅតាមភូមិ​ឃុំផ្លូវលេខ៤​៧៤

 ល្បែងស៊ីសងតាមអនឡាញចាប់ផ្ដើមងើបឡើងវិញនៅតាមភូមិ ឃុំយ៉ាងគគ្រឹកគគ្រេង។ទីតាំងល្បែងស៊ីសងខុសច្បាប់គ្រប់ប្រភេទតាមប្រព័ន្ធអនឡាញមាន់ជល់អាប៉ោងភ្នាល់បាល់ឡូតូនៅតាមបណ្តោយផ្លូវលេខ៤៧៤ស្ថិតនៅក្នុងសង្កាត់បឹងត្របែកខណ្ឌចំការមនរាជធានីភ្នំពេញកំពុងបើកដំណើរការឡើងវិញយ៉ាងភ្លូកទឹកភ្លូកដី។សកម្មភាពលបលួចលេងល្បែងស៊ីសងទាំងនេះគឺមិនបង្ហាញរូបភាពទ្រង់ទ្រាយធំ ដោយដាក់បង្ហាញតាមអេក្រង់ទូរទស្សន៍ឬផ្ទាំង LCD ដូចមុនឡើយ ពោលគឺអ្នកចាំទូទាត់ប្រាក់ និងអ្នកប្រព្រឹត្តល្បែង អង្គុយនៅពីមុខកុំព្យូទ័រ ឬ Laptop ដើម្បីភ្នាល់ល្បែង។បើទោះជាពួកគេ អះអាងថា មានច្បាប់ត្រឹមត្រូវក្តី។ប៉ុន្តែវាក៏កំពុងដើរបញ្ច្រាសគ្នាជាមួយគោលនយោបាយភូមិ ឃុំ មានសុវត្ថិភាព និងលុបបំបាត់ល្បែងស៊ីសង តាមមូលដ្ឋានរបស់រដ្ឋាភិបាលផងដែរ។

ល្បែងស៊ី​សងតាមអនឡាញចាប់ផ្ដើមងើបឡើងវិញនៅតាមភូមិ ឃុំផ្លូវលេខ៤៧៤។

កាលពីខែកញ្ញា ឆ្នាំ២០២២ សម្ដេចនាយករដ្ឋមន្ត្រី ហ៊ុន​ សែន បានចេញវិធានការដាច់ណាត់មួយ ដោយបញ្ជាឱ្យអភិបាលរាជធានី-ខេត្ត និងអាជ្ញាធរពាក់ព័ន្ធ ក្នុងមូលដ្ឋាន ចុះបង្ក្រាបល្បែងស៊ីសងគ្រប់ប្រភេទ ក្រោយមានការរិះគន់។ សម្ដេច ហ៊ុន សែន ក៏បានព្រមានដកតំណែងថ្នាក់ដឹកនាំមូលដ្ឋាន ដែលបណ្ដែតបណ្ដោយឱ្យមានល្បែងស៊ីសងកើតឡើងក្នុងតំបន់ផងដែរ។«ខ្ញុំមិនស្ទាក់ស្ទើក្នុងការដកតំណែងអភិបាលខេត្ត រាជធានី អភិបាលស្រុក ខណ្ឌឬមន្ត្រីនគរបាលថ្នាក់ណាក៏ដោយដែលរកឃើញថា​មិនទទួលខុសត្រូវលើមុខងាររបស់ខ្លួន។យើងមិនអាចបណ្ដោយឱ្យសភាពការណ៍បង្កឡើងបែបអានាធិបតេយ្យក្នុងបនល្បែងទៀតទេ»។ នេះជាសារសម្ដេច ហ៊ុន សែន កន្លងមក។ជុំវិញបញ្ហាល្បែងស៊ីសង ត្រូវបានអ្នកតាមដានសង្គម ធ្លាប់លើកឡើងថា វាគឺជាដើមចម ដែលនាំឱ្យមានអំពើហិង្សាក្នុងគ្រួសារ និងមានករណីចោរលួច ចោរប្លន់ ដែលបង្កភាពអសន្តិសុខ នៅក្នុងសង្គមផងដែរ៕ជាគន្ធា