ជប៉ុន​​និងអ៊ុ​យក្រែនចរចា​លើកា​រធា​នាសន្តិសុខ

 ប្រធានាធិបតីZelenskyបានប្រកាសថាប្រទេសជប៉ុនបានចាប់ផ្តើមកិច្ចសន្ទនាជាមួយអ៊ុយក្រែនអំពីការធានាសន្តិសុខសម្រាប់ប្រទេសនេះដោយផ្អែកលើសេចក្តីថ្លែងការណ៍រួមG7។ប្រធានាធិបតីអ៊ុយក្រែនលោក Volodymyr Zelenskyបាននិយាយកាលពីថ្ងៃសុក្រថា"ខ្ញុំស្វាគមន៍រដ្ឋមន្ត្រីការបរទេសជប៉ុន Hayashi Yoshimasa ទៅកាន់អ៊ុយក្រែន។ យើងបានយល់ព្រមចាប់ផ្តើមការចរចាលើកិច្ចព្រមព្រៀងទ្វេភាគីស្តីពីការធានាសន្តិសុខដោយផ្អែកលើសេចក្តីថ្លែងការណ៍ថ្មីៗនេះរបស់ក្រុមG7" ។

រដ្ឋមន្ត្រី​ការបរទេស​ជប៉ុន Yoshimasa Hayashi (ឆ្វេង) និង​រដ្ឋមន្ត្រី​មហាផ្ទៃ​អ៊ុយក្រែន Ihor Klymenko ក្នុង​ទីក្រុងគៀវកាលពី​ថ្ងៃ​ទី៩ ខែ​កញ្ញា។ រូបថត៖Reuters

រដ្ឋមន្ត្រីការបរទេស Yoshimasa បានមកដល់រដ្ឋធានីគៀវនៅព្រឹកថ្ងៃដដែល ហើយដំណើរទស្សនកិច្ចនេះមិនត្រូវបានប្រកាសជាមុនទេ។ លោក Zelenskyបាននិយាយថាប្រទេសជប៉ុនគឺជាដៃគូដ៏សំខាន់របស់អ៊ុយក្រែននៅក្នុងតំបន់អាស៊ី។G7 រួមមាន បារាំង អាល្លឺម៉ង់ អ៊ីតាលី ជប៉ុន អាមេរិក អង់គ្លេស និងកាណាដា។ កាល​ពី​ខែ​កក្កដា មេដឹកនាំ​នៃ​ប្រទេស​នានា​បាន​ប្រកាស​ពី​ក្របខណ្ឌ​គោល​នយោបាយ​សន្តិសុខ​រយៈពេល​វែង​សម្រាប់​បញ្ហា​អ៊ុយក្រែន។ផែនការនេះផ្តល់នូវក្របខ័ណ្ឌសម្រាប់ប្រទេសនីមួយៗដើម្បីបង្កើតកិច្ចព្រមព្រៀងទ្វេភាគីជាមួយទីក្រុងគៀវដោយរៀបរាប់លម្អិតអំពីប្រភេទអាវុធដែលពួកគេនឹងផ្តល់ដើម្បីពង្រឹងសមត្ថភាពការពាររបស់អ៊ុយក្រែន។ ជាថ្នូរមកវិញ អ៊ុយក្រែនបានសន្យាបន្តអនុវត្តកំណែទម្រង់ រួមទាំងក្នុងវិស័យមួយចំនួនដូចជា ការអនុវត្តច្បាប់ការប្រឆាំងអំពើពុករលួយ និងអភិបាលកិច្ចសាជីវកម្ម។មន្ត្រីលោកខាងលិចមើលឃើញសេចក្តីថ្លែងការណ៍រួមនៅទីក្រុងVilniusប្រទេសលីទុយអានីក្នុងខែកក្កដាថាជាការបង្កើតមូលដ្ឋានសម្រាប់ប្រទេសនានាដើម្បីរក្សាការគាំទ្រសម្រាប់អ៊ុយក្រែនជាច្រើនឆ្នាំខាងមុខ គោលបំណងដើម្បីបញ្ចប់អរិភាពក្នុងអ៊ុយក្រែន និងដើម្បីរារាំង និងឆ្លើយតបទៅនឹងការគំរាមកំហែងណាមួយនៃការវាយប្រហារនាពេលអនាគត។ទន្ទឹមនឹងនេះទីក្រុងម៉ូស្គូបានរិះគន់សេចក្តីថ្លែងការណ៍ការប្តេជ្ញាចិត្តរបស់G7ថាជាការខុសឆ្គងនិងគ្រោះថ្នាក់ដែលគំរាមកំហែងដល់សន្តិសុខរបស់រុស្ស៊ី។ អ្នកនាំពាក្យវិមានក្រឹមឡាំង លោក Dmitry Peskov បានអត្ថាធិប្បាយថា "តាមរយៈការផ្តល់ការធានាសន្តិសុខដល់អ៊ុយក្រែន ពួកគេបានធ្វើឱ្យសន្តិសុខរបស់រុស្ស៊ីចុះខ្សោយហើយនឹងធ្វើឱ្យអឺរ៉ុបកាន់តែមានគ្រោះថ្នាក់សម្រាប់ឆ្នាំខាងមុខ"។ចាប់តាំងពីសង្គ្រាមផ្ទុះឡើងនៅអ៊ុយក្រែនក្នុងខែកុម្ភៈ ឆ្នាំ២០២២ប្រទេសលោកខាងលិចបានផ្តល់គ្រាប់រំសេវ និងអាវុធយ៉ាងច្រើនដល់ក្រុងគៀវ។ ទីក្រុងម៉ូស្គូបានរិះគន់សកម្មភាពលោកខាងលិចនេះម្តងហើយម្តងទៀតថាគ្រាន់តែជាការបង្កើនជម្លោះនិងការបរាជ័យក្នុងការស្វែងរកដំណោះស្រាយ៕ប្រភពReuters, Ukrinform