នាយ​ក​​រ​​ដ្ឋមន្ត្រីជប៉ុនចង់ជួប​លោ​កKim Jon​g-un

នាយករដ្ឋមន្ត្រីជប៉ុន លោក Kishida បានត្រៀមខ្លួនរួចជាស្រេច ដើម្បីជួបមេដឹកនាំកូរ៉េខាងជើង លោក Kim Jong-unនៅពេលណាមួយ និងដោយគ្មានលក្ខខណ្ឌជាមុន។ប្រមុខខុទ្ទកាល័យជប៉ុនលោក Hirokazu Matsuno បាននិយាយកាលពីថ្ងៃទី១៥ខែកញ្ញាថា "យើងចង់រៀបចំការពិភាក្សាកម្រិតខ្ពស់ក្រោមការដឹកនាំផ្ទាល់របស់នាយករដ្ឋមន្ត្រីដើម្បីឈានទៅកិច្ចប្រជុំកំពូលឱ្យបានឆាប់តាមដែលអាចធ្វើទៅបាន" ។ 

នាយករដ្ឋមន្ត្រីជប៉ុនលោក Fumio Kishida នៅទីក្រុងតូក្យូ កាលពីថ្ងៃទី ២១ ខែមិថុនា។ រូបថត៖ AFP

លោក Matsuno បានបន្ថែមថា នាយករដ្ឋមន្ត្រី Kishida "បានបង្ហាញពីការប្តេជ្ញាចិត្តរបស់លោកក្នុងការជួបទល់មុខគ្នា" ជាមួយលោក Kim Jong-un "នៅពេលណាក៏បាន និងដោយគ្មានលក្ខខណ្ឌជាមុន" ។កូរ៉េ​ខាង​ជើង​មិន​បាន​ឆ្លើយ​តប​នឹង​សេចក្តីថ្លែងការណ៍​របស់​ជប៉ុន​ទេ។សេចក្តីថ្លែងការណ៍របស់ប្រទេសជប៉ុនត្រូវបានធ្វើឡើងក្នុងបរិបទដែលលោកKim Jong-unកំពុងបំពេញទស្សនកិច្ចនៅរុស្ស៊ីចុងបូព៌ា និងជួបជាមួយប្រធានាធិបតីVladimir Putin។ មេដឹកនាំរុស្ស៊ីបានលើកឡើងពីលទ្ធភាពនៃប្រទេសទាំង២សហការលើបច្ចេកវិទ្យាយោធាទោះបីជាលោកបានបញ្ជាក់ថាលោកនឹងនៅតែអនុវត្តតាមការរឹតបន្តឹងអន្តរជាតិដែលដាក់លើទីក្រុងព្យុងយ៉ាង។ វិមានក្រឹមឡាំងក៏បានលើកឡើងពីទស្សនវិស័យរបស់ប្រទេសទាំង២ក្នុងការសហការគ្នាក្នុងលំហ។ជប៉ុន​ចាត់​ទុក​ការ​កាន់​កាប់​អាវុធ​នុយក្លេអ៊ែរ​របស់​កូរ៉េ​ខាង​ជើង​ជា​ការ​ព្រួយ​បារម្ភ​សម្រាប់​ប្រទេស​ជិត​ខាង។ កាសែតការពារជាតិរបស់ប្រទេសជប៉ុនកាលពីខែកក្កដាបាននិយាយថា ចលនាយោធារបស់កូរ៉េខាងជើង បង្កការគំរាមកំហែងយ៉ាងធ្ងន់ធ្ងរ និងបន្ទាន់ដល់សន្តិសុខជាតិរបស់ប្រទេសជប៉ុនជាងពេលមុនៗ។ទន្ទឹមនឹងនេះ កូរ៉េខាងជើងបានបង្កើនភាពញឹកញាប់នៃការធ្វើតេស្តមីស៊ីល ដោយនិយាយថា នេះគឺជាការអនុវត្តសិទ្ធិរបស់ខ្លួនក្នុងការការពារខ្លួន ក៏ដូចជា "ការព្រមានជាក់ស្តែងខ្លាំង" ដល់គូប្រជែងរបស់ខ្លួន៕ប្រភព AFP