Putinនឹ​​​ងមិន​និ​​យាយនៅ​​ឯG20ទេ

 វិមានក្រឹមឡាំងបាននិយាយថាប្រធានាធិបតីPutinមិនមានគម្រោងនិយាយតាមរយៈវីដេអូនៅឯកិច្ចប្រជុំកំពូលG20នៅក្នុងប្រទេសឥណ្ឌាទេ បន្ទាប់ពីបានសម្រេចចិត្តមិនចូលរួមដោយផ្ទាល់។នៅក្នុងសន្និសីទសារព័ត៌មាននៅទីក្រុងម៉ូស្គូថ្ងៃនេះនៅពេលសួរថាតើប្រធានាធិបតីVladimir Putinនឹងនិយាយតាមរយៈវីដេអូឬយ៉ាងណា អ្នកនាំពាក្យវិមានក្រឹមឡាំង លោក Dmitry Peskov បានប្រាប់អ្នកសារព័ត៌មានថា "មិនមានផែនការបែបនេះទេ" ។

ប្រធានាធិបតីVladimir Putin។AFP

លោក Peskov បាននិយាយថា "អ្វីគ្រប់យ៉ាងនៅឯកិច្ចប្រជុំ G20 នៅទីក្រុងញូវដេលី នឹងត្រូវបានដោះស្រាយដោយរដ្ឋមន្ត្រីការបរទេស Sergey Lavrov" ។ "អ្នកការទូតនិងអ្នកជំនាញរុស្ស៊ីកំពុងបំពេញយ៉ាងសកម្មនូវឯកសារសម្រាប់សន្និសីទនេះ"។លោកLavrovក៏បានតំណាងឱ្យប្រទេសរុស្ស៊ីនៅក្នុងសន្និសីទ BRICS កាលពីខែមុននៅទីក្រុង Johannesburg ប្រទេសអាហ្វ្រិកខាងត្បូង បន្ទាប់ពីមានភាពចម្រូងចម្រាសលើដីការបស់តុលាការឧក្រិដ្ឋកម្មអន្តរជាតិ (ICC)សម្រាប់ការចាប់ខ្លួនប្រធានាធិបតីរុស្ស៊ី។ ក្រោយមកលោកប្រធានាធិបតីPutinបានថ្លែងសុន្ទរកថាជាវីដេអូនៅឯសន្និសីទដោយចោទប្រកាន់លោកខាងលិចថាជាអ្នកទទួលខុសត្រូវចំពោះជម្លោះនៅអ៊ុយក្រែន។លោកLavrovនឹងដឹកនាំគណៈប្រតិភូរុស្ស៊ីក្នុងនាមលោកប្រធានាធិបតី Putin ទៅកាន់កិច្ចប្រជុំកំពូល G20 នៅថ្ងៃទី៩-១០ខែកញ្ញា ដែលមេដឹកនាំលោកខាងលិចជាច្រើនដូចជាសហរដ្ឋអាមេរិក បារាំង និងអាល្លឺម៉ង់នឹងមានវត្តមាន។ ក្រៅពីមេដឹកនាំ G20 ប្រមុខនៃប្រទេសបង់ក្លាដែស អេហ្ស៊ីប ម៉ូរីស ហូឡង់ នីហ្សេរីយ៉ា អូម៉ង់ សិង្ហបុរី អេស្បាញ និងអារ៉ាប់រួម (UAE) ក៏ត្រូវបានអញ្ជើញផងដែរ។G20 គឺជាប្រទេសដែលមានសេដ្ឋកិច្ចកំពូលទាំង ២០ របស់ពិភពលោក ដែលស្មើនឹងជាង៩០% នៃសេដ្ឋកិច្ចពិភពលោកសរុប។ កិច្ចប្រជុំកំពូល G20 គឺជាកន្លែងដែលមេដឹកនាំពិភាក្សាអំពីបញ្ហាសេដ្ឋកិច្ចសំខាន់ៗ ជំរុញគោលនយោបាយទាក់ទងនឹងស្ថិរភាពស្ថានភាពហិរញ្ញវត្ថុអន្តរជាតិ ក៏ដូចជាការអភិវឌ្ឍន៍ទិសដៅសម្រាប់សេដ្ឋកិច្ចពិភពលោក។ ឥណ្ឌាជាប្រធាន G20 នៅឆ្នាំនេះ។Putinបានចូលរួមកិច្ចប្រជុំ G20 ក្នុងឆ្នាំ ២០២០ និង ២០២១ តាមអ៊ីនធឺណិត ដោយសារ Covid-19។ លោកមិនបានចូលរួមកិច្ចប្រជុំកំពូល G20 កាលពីឆ្នាំមុននៅកោះបាលី ប្រទេសឥណ្ឌូនេស៊ីដែលមេដឹកនាំសេដ្ឋកិច្ចបានរិះគន់រុស្ស៊ីជុំវិញអរិភាពនៅអ៊ុយក្រែន៕ប្រភព AFP, TASS