អ៊ីស្រាអែ​ល​បាន​បង្កើន​ការ​​វាយ​ប្រហារ​ផ្លូវ​អាកាស​​លើ​តំបន់​ហ្គាហ្សា

កងទ័ពអ៊ីស្រាអែលបានប្រកាសបង្កើនការវាយប្រហារតាមអាកាសលើតំបន់ហ្គាហ្សាស្ទ្រីបដើម្បីរៀបចំលក្ខខណ្ឌល្អបំផុតសម្រាប់យុទ្ធនាការវាយប្រហារលើដី។"យើងនឹងចូលទៅក្នុងដំណាក់កាលបន្ទាប់នៃសង្រ្គាមក្រោមលក្ខខណ្ឌដ៏ល្អបំផុតមិនមែនយោងទៅតាមអ្វីដែលអ្នកដទៃនិយាយនោះទេ។ អ៊ីស្រាអែលកំពុងបង្កើនការវាយប្រហារតាមអាកាសដើម្បីកាត់បន្ថយគ្រោះថ្នាក់។ យើងនឹងបង្កើនការវាយឆ្មក់របស់យើង ដើម្បីធានាសុវត្ថិភាព” ។អ្នកនាំពាក្យក្រសួងការពារជាតិអ៊ីស្រាអែល លោក Daniel Hagari បាននិយាយនៅថ្ងៃទី ២១ ខែតុលា។

ផ្សែងបានហុយឡើងនៅទីក្រុងហ្គាហ្សាបន្ទាប់ពីការវាយប្រហារតាមអាកាសរបស់អ៊ីស្រាអែលកាលពីថ្ងៃទី២១ខែតុលា។ រូបថត៖ AFP

មេបញ្ជាការ​យោធា​អ៊ីស្រាអែល​ជាច្រើន​នាក់​នៅ​ថ្ងៃ​ជាមួយ​គ្នា​បាន​ទៅ​មើល​អង្គភាព​ជួរមុខ​ដើម្បី​ពិនិត្យ​ការ​ត្រៀមប្រយុទ្ធ។"យើងនឹងចូលទៅក្នុងតំបន់ហ្គាហ្សា។ វាជាតំបន់ដែលមានប្រជាជនរស់នៅច្រើនសត្រូវបានរៀបចំអ្វីៗជាច្រើននៅទីនោះ។ប៉ុន្តែយើងក៏ត្រៀមខ្លួនជាស្រេចក្នុងការឆ្លើយតបផងដែរ។ បេសកកម្មប្រយុទ្ធនេះនឹងប្រព្រឹត្តទៅប្រកបដោយវិជ្ជាជីវៈសំដៅបំផ្លាញធនធានមនុស្ស និងហេដ្ឋារចនាសម្ព័ន្ធនៃក្រុមហាម៉ាស់"។ នាយសេនាធិការកងទ័ពអ៊ីស្រាអែល លោក Herzi Halevi បាននិយាយខណៈពេលកំពុងត្រួតពិនិត្យកងពលតូចថ្មើរជើងមួយ ដែលដាក់ពង្រាយនៅជិតតំបន់ហ្គាហ្សាស្ទ្រីប។យុទ្ធនាការវាយប្រហារតាមអាកាសរបស់អ៊ីស្រាអែល លើតំបន់ហ្គាហ្សាស្ទ្រីប មកទល់ពេលនេះ បានសម្លាប់ជនជាតិប៉ាឡេស្ទីនជាង ៤.១០០នាក់ ដែលភាគច្រើនជាជនស៊ីវិល។មន្ត្រីអ៊ីស្រាអែលកាលពីសប្តាហ៍មុនបានស្នើឱ្យអ្នកស្រុកជាងមួយលាននាក់នៅភាគខាងជើងទីក្រុងហ្គាហ្សា ផ្លាស់ទីទៅភាគខាងត្បូងដោយជឿថាមេដឹកនាំក្រុមហាម៉ាស់និងហេដ្ឋារចនាសម្ព័ន្ធត្រូវបានប្រមូលផ្តុំនៅក្នុងតំបន់នេះ។ យ៉ាង​ណា​ក៏​ដោយមនុស្ស​រាប់​សែន​នាក់​នៅ​តែ​តោង​ជាប់​ទីក្រុងហ្គាហ្សានិង​តំបន់​ជុំវិញ។បន្ទាប់ពីក្រុមហាម៉ាស់បានបើកការវាយប្រហារទ្រង់ទ្រាយធំលើអ៊ីស្រាអែលកាលពីថ្ងៃទី៧ខែតុលា រដ្ឋាភិបាលរបស់នាយករដ្ឋមន្ត្រី Benjamin Netanyahuបានចាប់ផ្តើមយុទ្ធនាការឆ្លើយតបផ្នែកយោធានិងការបិទផ្លូវដ៏ទូលំទូលាយនៃហ្គាហ្សាស្រី្ទបរួមទាំងការកាត់ផ្តាច់ការផ្គត់ផ្គង់អគ្គិសនី ទឹក និងថាមពល និងការបិទព្រំដែន។អ៊ីស្រាអែល​បាន​អះអាង​ថា វិធានការ​បិទ​ផ្លូវ​គឺ​ជា​ការ​ចាំ​បាច់​ដើម្បី "កម្ចាត់​ក្រុម​ហាម៉ាស់" និង​ធានា​សន្តិសុខ​ជាតិ។ ទោះជាយ៉ាងណាក៏ដោយ សហគមន៍អន្តរជាតិបានរិះគន់ថានេះជាទង្វើនៃ "ការដាក់ទណ្ឌកម្មរួម" ដែលគំរាមកំហែងដល់ជនស៊ីវិលនិងប្រថុយនឹងបង្កឱ្យមានគ្រោះមហន្តរាយមនុស្សធម៌នៅក្នុងតំបន់ហ្គាហ្សាស្ទ្រីប។រថយន្តដឹកទំនិញចំនួន២០គ្រឿងដែលគ្រប់គ្រងដោយអង្គការអឌ្ឍចន្ទក្រហមអេហ្ស៊ីបនៅថ្ងៃទី២១ ខែតុលាបានឆ្លងកាត់ច្រកព្រំដែន Rafah ចូលទៅក្នុងហ្គាហ្សាស្រ្ទីប។ នេះ​ជា​ការ​ដឹក​ជញ្ជូន​ជំនួយ​ដំបូង​ដែល​មក​ដល់​ក្នុង​តំបន់​បន្ទាប់​ពី​ជម្លោះ​ជិត​២​សប្តាហ៍៕ប្រភពAFP