ពលរដ្ឋ​ថៃ​២​នាក់​បាន​ស្លាប់​ពេល​ក្រុម​​ហាម៉ាស​វាយ​ប្រហារ​អ៊ីស្រា​អែល

 នាយករដ្ឋមន្ត្រីថៃSrettha Thavisinបាននិយាយថា ពលរដ្ឋ២នាក់នៃប្រទេសនេះត្រូវបានសម្លាប់នៅក្នុងអំពើហិង្សារវាងកងកម្លាំងអ៊ីស្រាអែលនិងក្រុមសកម្មប្រយុទ្ធប៉ាឡេស្ទីនហាម៉ាស់។នាយករដ្ឋមន្ត្រី Thavisin កាលពីថ្ងៃទី ៨ ខែតុលា បានសរសេរនៅលើបណ្តាញសង្គម X ដែលជាអតីត Twitter ដោយនិយាយថាលោកបានទទួលរបាយការណ៍ពីឯកអគ្គរដ្ឋទូតថៃប្រចាំនៅទីក្រុង Tel Aviv "អំពីប្រជាជនថៃ២នាក់បានស្លាប់ដោយសារអំពើហិង្សា"។ លោក​បាន​បន្ថែម​ថាក្រសួង​ការ​បរទេស​ថៃ​កំពុង​ធ្វើ​ការ​ដើម្បី​ជម្លៀស​ពលរដ្ឋ​ចេញ​ពី​ប្រទេស​អ៊ីស្រាអែល។កន្លងមក ក្រសួងការបរទេសថៃបានប្រកាសថា ពលរដ្ឋថៃចំនួន១១នាក់ត្រូវបានចាប់ធ្វើជាចំណាប់ខ្មាំងក្នុងអំឡុងពេលប្រយុទ្ធគ្នានៅភាគខាងត្បូងប្រទេសអ៊ីស្រាអែលហើយប្រហែលជាត្រូវបានគេនាំទៅតំបន់ហ្គាហ្សាស្ទ្រីប។លោកនាយក​រដ្ឋមន្ត្រី Thavisin បាន​និយាយ​ថា​៖ «​ពួកគេ​គ្មាន​កំហុស ហើយ​មិន​ពាក់ព័ន្ធ​នឹង​ជម្លោះ​ណាមួយ​ឡើយ​។មាន​ជនជាតិ​ថៃ​ប្រហែល​៥.០០០​នាក់​រស់នៅ​តំបន់​ភាគ​ខាងត្បូង​នៃ​ប្រទេស​អ៊ីស្រាអែល​ដែល​មាន​អំពើ​ហិង្សា​កើតឡើង​ភាគច្រើនជាកសិករ។

វិហារអ៊ីស្លាមមួយត្រូវបានបំផ្លាញនៅក្នុងការវាយប្រហាររបស់អ៊ីស្រាអែលនៅ Khan Younis ភាគខាងត្បូង Gaza Strip ថ្ងៃទី៨ខែតុលា។ រូបថត៖ Reuters

លោក ហ៊ុន ម៉ាណែត នាយក​រដ្ឋមន្ត្រី​កម្ពុជា​បាន​ថ្លែង​ក្នុង​ថ្ងៃ​ដដែល​ថានិស្សិត​នៅ​អ៊ីស្រាអែល​ក៏​បាន​ស្លាប់​ដែរ​ពេល​មាន​អំពើ​ហិង្សា​ផ្ទុះ​ឡើង។ស្ថានទូត​អង់គ្លេស​បាន​បញ្ជាក់​ថាពលរដ្ឋ​អង់គ្លេស​ដើម​កំណើត​អ៊ីស្រាអែល​ម្នាក់​ឈ្មោះ Marlow បាន​បាត់​ខ្លួន​ក្នុង​តំបន់​បន្ទាប់​ពី​ចូលរួម​ពិធី​ជប់លៀង​ក្បែរ​តំបន់ Kibbutz Re'im។ Marlow បានផ្លាស់ទៅរស់នៅប្រទេសអ៊ីស្រាអែលកាលពីពីរឆ្នាំមុន ហើយកំពុងធ្វើការនៅក្នុងការងារដែលទាក់ទងនឹងសន្តិសុខ។សាច់ញាតិ​មិន​បាន​ទទួល​ដំណឹង​ពី​គាត់​តាំងពី​ម៉ោង៨ និង​៤៥​នាទី​ព្រឹក​ថ្ងៃ​ទី​៧ តុលា ។ រូបថតពីពិធីជប់លៀងបង្ហាញថាមនុស្សជាច្រើនត្រូវបានក្រុមហាម៉ាសចាប់ធ្វើជាចំណាប់ខ្មាំង។ក្រសួងការបរទេសហ្វីលីពីនបានប្រកាសថា ខ្លួនកំពុងផ្ទៀងផ្ទាត់ព័ត៌មានអំពីលទ្ធភាពដែលពលរដ្ឋហ្វីលីពីនអាចត្រូវបានចាប់ពង្រត់ដោយពួកសកម្មប្រយុទ្ធហាម៉ាស់ក្នុងអំឡុងពេលវាយប្រហារលើអ៊ីស្រាអែល។កាលពីថ្ងៃទី៧ខែតុលាកងកម្លាំងហាម៉ាស់បានបាញ់រ៉ុក្កែតរាប់ពាន់គ្រាប់ ហើយបានធ្វើការវាយឆ្មក់សម្របសម្រួលដោយផ្លូវគោក ឆ័ត្រយោង ផ្លូវអាកាស និងសមុទ្រចូលទៅក្នុងប្រទេសអ៊ីស្រាអែល។ យុទ្ធនាការ​នេះ​បាន​ធ្វើ​ឲ្យ​មនុស្ស​យ៉ាង​ហោច​ណាស់៣០០​នាក់​ស្លាប់ និង​ជាង ១.៥០០​នាក់​រង​របួស។លោក Mohammad Deif មេបញ្ជាការជាន់ខ្ពស់នៃក្រុមប្រដាប់អាវុធហាម៉ាស់ដែលគ្រប់គ្រងតំបន់ ហ្គាហ្សាបានប្រកាសថានេះជា"ថ្ងៃដំបូងនៃសមរភូមិដ៏ធំបំផុតដើម្បីបញ្ចប់ការកាន់កាប់" ។ក្រុមហាម៉ាស់បានសង្កត់ធ្ងន់ថាយុទ្ធនាការនេះបានកើតចេញពី "ការវាយប្រហារកាន់តែខ្លាំងឡើង" របស់ទីក្រុង Tel Aviv ទៅលើប្រជាជនប៉ាឡេស្ទីននៅតំបន់West Bank ទីក្រុង Jerusalem និងនៅក្នុងពន្ធនាគាររបស់អ៊ីស្រាអែល។រដ្ឋាភិបាល​អ៊ីស្រាអែល​បាន​ប្រកាស​ស្ថានភាព​នៃ​សង្រ្គាម។នាយករដ្ឋមន្ត្រីអ៊ីស្រាអែល លោក Benjamin Netanyahu បានបញ្ជាឱ្យមានការចល័តកងកម្លាំងបម្រុង និងបានសន្យាថានឹងឆ្លើយតបទៅនឹងក្រុមហាម៉ាស់ក្នុងទំហំដែលមិនធ្លាប់មានពីមុនមក។នេះគឺជាការឈ្លានពានដែលមិនធ្លាប់មានពីមុនមកក្នុងទឹកដីអ៊ីស្រាអែលហើយក៏ជាការកើនឡើងដ៏ធ្ងន់ធ្ងរបំផុតមួយនៃភាពតានតឹងនៅក្នុងតំបន់ក្នុងរយៈពេលជាច្រើនឆ្នាំ។ ការប្រយុទ្ធគ្នាខ្លាំងបំផុតរវាងអ៊ីស្រាអែល និងក្រុមប្រដាប់អាវុធនៅតំបន់ហ្គាហ្សាស្ទ្រីបបានកើតឡើងនៅពាក់កណ្តាលឆ្នាំ២០២១៕ប្រភពAFP