សមាជិ​​កស​​ភាមកពីគណបក្សសាធារណរដ្ឋបានតែ​ង​តាំងលោកTrump​ធ្វើជាប្រធានសភា

សមាជិកសភាពីររូបនៃគណបក្សសាធារណរដ្ឋបានប្រកាសថាពួកគេនឹងតែងតាំងអតីតប្រធានាធិបតី Trump ឱ្យធ្វើជាប្រធានសភាបន្ទាប់ពីលោក McCarthyត្រូវបានបណ្តេញចេញពីតំណែង។"នៅពេលដែលសភាតំណាងរាស្រ្តអាមេរិកកោះប្រជុំឡើងវិញ ការងារដំបូងរបស់ខ្ញុំគឺតែងតាំងលោក Donald Trump ឱ្យធ្វើជាប្រធានសភា។ លោកប្រធានាធិបតី Trump ដែលជាប្រធានាធិបតីដ៏អស្ចារ្យបំផុតក្នុងជីវិតរបស់ខ្ញុំ បានបង្ហាញឱ្យឃើញថា លោកជួយអាមេរិកមុនគេ ហើយនឹងជួយសភា។ លោក Troy Nehls សមាជិកសភាមកពីគណបក្សសាធារណរដ្ឋតំណាងឱ្យរដ្ឋតិចសាស់ បាននិយាយកាលពីថ្ងៃទី៣ខែតុលា។សមាជិកសភាមកពីគណបក្សសាធារណរដ្ឋតំណាងឱ្យរដ្ឋ Florida Greg Steube ក៏បានប្រកាសនៅលើ Twitter ថាលោកនឹងតែងតាំងលោក Trump ឱ្យធ្វើជាប្រធានសភា។

លោក Donald Trump ។AFP

យោងតាមបទប្បញ្ញត្តិរបស់សភាអាមេរិក ប្រធានសភាតំណាងរាស្រ្តអាមេរិក មិនតម្រូវឱ្យធ្វើជាសមាជិកសភាបច្ចុប្បន្នទេ។ ទោះបីជាយ៉ាងណាក៏ដោយ គ្មានបុគ្គលណាដែលមិនមែនជាសមាជិកសភាដែលមិនធ្លាប់ត្រូវបានបោះឆ្នោតឱ្យកាន់តំណែងនេះនៅក្នុងប្រវត្តិសាស្ត្រអាមេរិកឡើយ។ដើម្បី​ជាប់​ឆ្នោត​ជា​ប្រធាន​សភា បេក្ខជន​ត្រូវ​តែ​ទទួល​បាន​ការ​គាំទ្រ​ច្រើន​លើសលប់​ពី​សមាជិក​សភា។ គណបក្ស​សាធារណរដ្ឋ​កាន់កាប់​សំឡេង​ភាគច្រើន​នៅក្នុង​សភា​ដែលមាន​អាសនៈ​ចំនួន ២២១ខណៈ​គណបក្ស​ប្រជាធិបតេយ្យ​គ្រប់គ្រង​ចំនួន២១២អាសនៈ។សមាជិកសភាប្រជាធិបតេយ្យទំនងជានឹងប្រឆាំងលោកTrump។ប៉ុន្តែវាមិនច្បាស់ទេថាតើអត្រានៃការគាំទ្ររបស់លោកខ្ពស់ប៉ុណ្ណាក្នុងចំណោមអ្នកសាធារណរដ្ឋ។មុនពេលគណបក្សសាធារណរដ្ឋទទួលបានសំឡេងភាគច្រើននៅក្នុងសភាតំណាងរាស្រ្តអាមេរិកបន្ទាប់ពីការបោះឆ្នោតពាក់កណ្តាលអាណត្តិឆ្នាំ២០២២អតីតប្រធានាធិបតី Trump បានប្រកាសថាលោកមិនចាប់អារម្មណ៍ក្នុងការកាន់តំណែងប្រធានសភានោះទេ។អតីតប្រធានាធិបតីបាននិយាយកាលពីខែមីនាឆ្នាំ២០២២ ថា "នោះមិនមែនជាអ្វីដែលខ្ញុំចង់បាននោះទេទោះបីជាមនុស្សជាច្រើនបានលើកឡើងពីវា។ ខ្ញុំចង់សង្កេតមើលនូវអ្វីដែលកំពុងកើតឡើង ហើយយើងនឹងបន្តធ្វើរឿងផ្សេងទៀត"។តំណែងប្រធានសភាតំណាងរាស្រ្តអាមេរិកនៅទំនេរ បន្ទាប់ពីស្ថាប័ននេះបានបោះឆ្នោតកាលពីថ្ងៃទី៣ខែតុលា ដើម្បីបណ្តេញលោក Kevin McCarthy បន្ទាប់ពីសំណើរបស់សមាជិកសភា Matt Gaetz ។ នេះ​ជា​លើក​ទី​១​ក្នុង​ប្រវត្តិសាស្ត្រ​ដែល​សភា​តំណាង​រាស្ត្រ​អាមេរិក​គាំទ្រ​សេចក្តី​សម្រេច​ដក​តំណែង​ប្រធាន។សភាតំណាងសហរដ្ឋអាមេរិកគ្រោងនឹងរក្សាស្ថានភាពបច្ចុប្បន្នយ៉ាងហោចណាស់មួយសប្តាហ៍។សមាជិកសភាមកពីគណបក្សសាធារណរដ្ឋជាច្រើនបាននិយាយថា ពួកគេមានគម្រោងជួបប្រជុំគ្នានៅថ្ងៃទី១០ខែតុលា ដើម្បីស្វែងរកអ្នកស្នងតំណែងរបស់លោក McCarthy ដោយការបោះឆ្នោតជ្រើសរើសប្រធានសភាថ្មីដែលអាចធ្វើទៅបាននៅថ្ងៃទី ១១ខែតុលា៕ប្រភព Hill