អគ្គលេខាធិការដ្ឋាននៃគណៈកម្មការគ្រប់គ្រងល្បែងពាណិជ្ជកម្មកម្ពុជា (គ.ល.ក.) ជំរុញឱ្យអាជ្ញាធរមានសមត្ថកិច្ចពាក់ព័ន្ធចាត់វិធានការនិងបង្ក្រាបកាស៊ីណូអនឡាញ PK777ជាបន្ទាន់ ដែលបង្កផលប៉ះពាល់ដល់សន្តិសុខ និងអាជីវកម្មកាស៊ីណូដែលមានអាជ្ញាបណ្ណស្របច្បាប់។នេះបើតាមចេញផ្សាយKhmerTimes។
អគ្គលេខាធិការដ្ឋាននៃគណៈកម្មការគ្រប់គ្រងល្បែងពាណិជ្ជកម្មកម្ពុជាជំរុញឱ្យអាជ្ញាធរបង្ក្រាបកាស៊ីណូអនឡាញ PK777 ជាបន្ទាន់។ រូបភាព៖ គ.ល.ក
កាលពីថ្ងៃចន្ទ គ.ល.ក. បានចេញសេចក្ដីប្រកាសព័ត៌មានថា គណៈកម្មការបានពិនិត្យឃើញមានការផ្សព្វផ្សាយនៅតាមបណ្តាញសង្គមអំពីល្បែងស៊ីសងខុសច្បាប់តាមប្រព័ន្ធអនឡាញ រួមមានល្បែងបាការ៉ាត់ ស្លតម៉ាស៊ីន បក្សីកីឡា និងភ្នាល់បាល់ទាត់ជាដើម ក្រោមឈ្មោះ កាស៊ីណូអនឡាញ PKTZ។គណៈកម្មការខាងលើបន្ថែមថា ចំពោះដំណើរការលេង និងចូលរួមក្នុងសកម្មភាពល្បែងអនឡាញខាងលើនេះ គឺជាអំពើល្មើសច្បាប់ ដែលប្រឈមនឹងការផ្តន្ទាទោសយ៉ាងធ្ងន់ធ្ងរទៅតាមច្បាប់ជាធរមាន។គ.ល.ក. បញ្ជាក់ថា៖ «មិនត្រឹមតែប៉ុណ្ណោះ ការប្រព្រឹត្រ ឬលេងល្បែងស៊ីសងខុសច្បាប់ បានបង្កឱ្យមានផលប៉ះពាល់យ៉ាងខ្លាំងដល់សន្តិសុខនិងសណ្តាប់ធ្នាប់សង្គម និងប៉ះពាល់ដល់អាជីវកម្មកាស៊ីណូដែលមានអាជ្ញាបណ្ណស្របច្បាប់ផងដែរ»។គណៈកម្មការបន្តថា ចំពោះករណីខាងលើនេះ អគ្គលេខាធិការដ្ឋានជំរុញឱ្យអាជ្ញាធរមានសមត្ថកិច្ចពាក់ព័ន្ធធ្វើការចាត់វិធានការយ៉ាងក្តៅគគុកក្នុងការបង្ក្រាប កាស៊ីណូអនឡាញ PK777 នេះជាបន្ទាន់។អគ្គលេខាធិការដ្ឋាននៃ គ.ល.ក. ក៏បានក្រើនរំលឹកដល់សាធារណជនទាំងអស់ កុំប្រព្រឹត្ត ឬលេង ឬក៏ចូលរួមគាំទ្រល្បែងស៊ីសងខុសច្បាប់ ដែលប្រឈមនឹងការដាក់ទោសទណ្ឌ ទៅតាមច្បាប់ជាធរមាន។ករណីខាងលើនេះ កាសែតKhmerTimes ពុំអាចសុំការបញ្ជាក់បន្ថែមពីអ្នកនាំពាក្យក្រសួងមហាផ្ទៃ លោក ទូច សុខៈ បានឡើយកាលពីម្សិលមិញ។អ្នកនាំពាក្យស្នងការនគរបាលរាជធានីភ្នំពេញ លោក សាន សុខសីហា បានឱ្យដឹងថា កន្លងមកអាជ្ញាធររាជធានីបានចុះបង្ក្រាបទីតាំងល្បែងស៊ីសងខុសច្បាប់ជាច្រើនកន្លែង និងបន្តបើកការស៊ើបអង្កេតបន្ថែមទៀត។លោកថ្លែងថា ចាប់តាំងពីប្រមុខរាជរដ្ឋាភិបាលដាក់បញ្ជាមក គឺអាជ្ញាធររាជធានីបានចុះបង្ក្រាបទីតាំងកត់ឆ្នោតវៀតណាម ទីតាំងឡូតូ និងជល់មាន់អនឡាញ ជាដើម។លោក សុខសីហា បន្ថែមថា៖ «ខាងកម្លាំងនគរបាលនៃស្នងការនគរបាលរាជធានី ក៏ធ្លាប់សហការណ៍ជាមួយកម្លាំងអន្តោប្រវេសន៍ ដើម្បីឆែកឆេរតាមសណ្ឋាគារនិងខុនដូមួយចំនួនផងដែរ ដើម្បីបង្កើនប្រសិទ្ធភាពអនុវត្តច្បាប់ និងកាត់បន្ថយការលេងល្បែងតាមអនឡាញ»។លោក រស់ ភីរុណ អគ្គលេខាធិការនៃគណៈកម្មការគ្រប់គ្រងល្បែងពាណិជ្ជកម្ម ធ្លាប់បញ្ជាក់ថា រដ្ឋាភិបាលមិនបានផ្តល់អាជ្ញាបណ្ណឱ្យក្រុមហ៊ុនណាមួយ បើកដំណើរការល្បែងស៊ីសងតាមប្រព័ន្ធអេឡិចត្រូនិកនោះទេ ពោលរាល់ល្បែងអនឡាញទាំងអស់ដែលកំពុងដំណើរការនៅកម្ពុជា គឺសុទ្ធតែខុសច្បាប់។លោកបន្តថា បច្ចុប្បន្ន រដ្ឋាភិបាលផ្តល់អាជ្ញាបណ្ណ និងអនុញ្ញាតឱ្យដំណើរការល្បែងតែពីរប្រភេទប៉ុណ្ណោះ រួមមានកាស៊ីណូ និងល្បែងផ្សងសំណាង៕
/unnamed.png
Post a Comment