អ៊ីរ៉​ង់​បាន​ដាក់​ទណ្ឌកម្ម​លើ​មន្ត្រី​យោធា​អាមេ​រិក​និង​អង់គ្លេស​ចំពោះ​​ការ​គាំទ្រ​អ៊ីស្រាអែ​ល

អ៊ីរ៉ង់ថ្ងៃនេះ(ថ្ងៃទី២ឧសភា)បានប្រកាសដាក់ទណ្ឌកម្មជាបន្តបន្ទាប់ប្រឆាំងនឹងមេដឹកនាំយោធាអាមេរិកនិងអង់គ្លេសសម្រាប់ការគាំទ្រអ៊ីស្រាអែលក្នុងជម្លោះនៅតំបន់ហ្គាហ្សាស្ទ្រីប។

បណ្តាញសារព័ត៌មានNDTVបានដកស្រង់សេចក្តីថ្លែងការណ៍របស់ក្រសួងការបរទេសអ៊ីរ៉ង់ដែលសរសេរថាប្រទេសនេះបានដាក់ទណ្ឌកម្មលើពលរដ្ឋអាមេរិកចំនួន៧នាក់នៅពេលនេះរួមទាំងប្រធានបញ្ជាការប្រតិបត្តិការពិសេស (USSOCOM) លោក Bryan Fenton និងអគ្គសេនាធិការរងលោកឧត្តមនាវីឯកBrad Cooper ។ខាងអង់គ្លេស អ៊ីរ៉ង់ដាក់ទណ្ឌកម្មលើរដ្ឋមន្ត្រីការពារជាតិអង់គ្លេសGrant Shapps។“ទណ្ឌកម្មនេះក៏ផ្តោតទៅលើក្រុមហ៊ុនអាមេរិកដូចជា Lockheed Martin និង Chevron ក៏ដូចជាសាជីវកម្មចក្រភពអង់គ្លេសមួយចំនួនដូចជា Elbit Systems, Parker Meggitt និង Rafael UK ។បុគ្គល និងអាជីវកម្មទាំងនេះបានសម្របសម្រួលសកម្មភាពរបស់អ៊ីស្រាអែលក្នុងការរំលោភសិទ្ធិមនុស្ស។ការប្រើប្រាស់អាវុធធុនធ្ងន់ប្រឆាំងនឹងជនស៊ីវិល...បុគ្គលនិងក្រុមហ៊ុនខាងលើនឹងមានគណនីនិងប្រតិបត្តិការរបស់ពួកគេនៅក្នុងប្រព័ន្ធហិរញ្ញវត្ថុនិងធនាគាររបស់អ៊ីរ៉ង់ត្រូវបានរារាំងទ្រព្យសម្បត្តិរបស់ពួកគេត្រូវបានបង្កកក្នុងដែនសមត្ថកិច្ចរបស់អ៊ីរ៉ង់ក៏ដូចជាការហាមឃាត់ការផ្តល់ទិដ្ឋាការនិងការចូលទៅក្នុងទឹកដីអ៊ីរ៉ង់”សេចក្តីថ្លែងការណ៍បានអាន។វាមិនច្បាស់ទេថាតើទណ្ឌកម្មទាំងនេះនឹងមានផលប៉ះពាល់អ្វីខ្លះដល់បុគ្គលនិងអង្គភាពដែលត្រូវបានដាក់ទណ្ឌកម្មក៏ដូចជាទ្រព្យសម្បត្តិឬប្រតិបត្តិការរបស់ពួកគេជាមួយអ៊ីរ៉ង់។រហូតមកដល់ពេលនេះ រដ្ឋាភិបាលក្រុងវ៉ាស៊ីនតោន និងទីក្រុងឡុងដ៍មិនទាន់បានធ្វើអត្ថាធិប្បាយលើការប្រកាសរបស់ទីក្រុងតេអេរ៉ង់អំពីការដាក់ទណ្ឌកម្មសំដៅលើមន្ត្រីយោធានិងអាជីវកម្មនៃប្រទេសទាំងពីរនេះទេ។យោងតាមទិន្នន័យដែលបានធ្វើបច្ចុប្បន្នភាពពី NDTV ជម្លោះអ៊ីស្រាអែលនិងក្រុមហាម៉ាស់ចាប់តាំងពីខែតុលាឆ្នាំមុនបានសម្លាប់ជនស៊ីវិលយ៉ាងហោចណាស់៣៤,៥៦៨នាក់នៅតំបន់ហ្គាហ្សាស្ទ្រីប ភាគច្រើនជាស្ត្រីនិងកុមារ៕ពុតសាម៉ាត់