ការនាំ​ចេ​ញ​របស់​កម្ពុជា​ធ្លាក់ចុះ​០​.​៨​​ភាគរយក្នុងរយៈ​ពេល​៩​ខែ​​ដំបូង​

 របាយការណ៍​របស់​អគ្គនាយកដ្ឋាន​គយ​និង​រដ្ឋាករ​ចេញផ្សាយ​កាលពី​ថ្ងៃអង្គារ​បាន​អោយ​ដឹង​ថា​ ​កម្ពុជា​បាន​នាំចេញ​ទំនិញ​មាន​តម្លៃ​ ​១​៦​.​៩​៤​ ​ពាន់​លាន​ដុល្លារ​ក្នុងរយៈពេល​៩​ខែ​ដំបូង​នៃ​ឆ្នាំ​ ​២​០​២​៣​ ​ធ្លាក់ចុះ​ ​០​.​៨​ ​ភាគរយ​ពី​ ​១​៧​.​០​៧​ ​ពាន់​លាន​ដុល្លារ​ក្នុងរយៈពេល​ដូចគ្នា​កាលពីឆ្នាំមុន​។​ទំនិញ​សំខាន់​ៗ​ដែល​កម្ពុជា​នាំចេញ​រួម​មាន​ ​ស​ម្លៀ​ក​បំពាក់​ ​ស្បែកជើង​ ​និង​ទំនិញ​ធ្វើដំណើរ​ ​កង់​ ​និង​ទំនិញ​កសិកម្ម​មួយ​ចំនួន​ដូចជា​ ​អង្ករ​ ​កៅស៊ូ​ ​ដំឡូងមី​ ​ចេក​ ​ស្វាយ​ ​និង​មៀន​ប៉ៃលិន​។​ការនាំចេញ​របស់​កម្ពុជា​ទៅកាន់​ប្រទេស​ចិន​បាន​កើន​ឡើង​ ​១​៨​.​៣​ ​ភាគរយ​ក្នុង​អំឡុង​ខែ​មករា​ដល់​ខែកញ្ញា​ឆ្នាំនេះ​។​

រូបភាពសហការី

របាយការណ៍​បាន​បង្ហាញ​ថា​ ​ប្រទេស​ចិន​គឺ​ជាគោល​ដៅ​នាំចេញ​ធំ​ជាងគេ​ទីបី​សម្រាប់​កម្ពុជា​បន្ទាប់ពី​សហរដ្ឋអាមេរិក​ ​និង​វៀតណាម​។​រដ្ឋលេខាធិការ​ក្រសួង​ពាណិជ្ជកម្ម​កម្ពុជា​ ​ឯកឧត្តម​ ​ប៉ែន​ សុ​វិជាតិ​ ​បាន​និយាយ​ថា​ ​កិច្ចព្រមព្រៀង​ភាពជា​ដៃគូ​សេដ្ឋកិច្ច​គ្រប់ជ្រុងជ្រោយ​ក្នុង​តំបន់​ ​និង​កិច្ចព្រមព្រៀង​ពាណិជ្ជកម្ម​សេរី​កម្ពុជា​-​ចិន​ ​បាន​ជំរុញ​កំណើន​នៃ​ការនាំចេញ​របស់​កម្ពុជា​ទៅ​ប្រទេស​ចិន​។​ឯកឧត្តម​បាន​ប្រាប់​ស៊ី​ន​ហួ​ថា​ “​កិច្ចព្រមព្រៀង​ទាំងពីរ​នេះ​គឺជា​កត្តា​ជំរុញ​សម្រាប់​កំណើន​ការនាំចេញ​រយៈពេល​វែង​ ​របស់យើង​ ​ហើយក៏​ជា​មេដែក​ដើម្បី​ទាក់ទាញ​ការ​វិនិយោគ​ផ្ទាល់​ពី​បរទេស​កាន់តែ​ច្រើន​មកកាន់​ប្រទេស​កម្ពុជា​ ​ផង​ដែរ​” ៕X​in​h​u​a/KhmerTimes